E total di 11 companianan cu a demostra interes den e destaho publico pa diseña, financia y opera un incinerator na Aruba awor kier tende di Gobierno con lo garantisa nan cu por recupera tur nan inversion, tur nan gasto di operacion plus un ganashi durante 20 aña. Tur riesgo lo ta pa Gobierno pa para garantia sabiendo e situacion financiero fragil di pais Aruba. Esaki por tin su consecuencia cune cu CAFT/LAFT.
Manera ta conoci, casi 20 compania a busca un copia di e destaho publico pero na final, despues di un proceso cu a dura mas o menos 1 aña, NINGUN di e companianan a participa. E motibo ta obvio, e condicionnan impone dor di Gobierno no ta haci e proyecto rendabel.
Mas cu djis saca e inversion grandi aki bek, tur participante kier un garantia di Gobierno pa e debe aki y cu ta lag’e riba Serlimar. Tambe lo desea pa drecha e tarifa cu WEB ta paga pa cumpra coriente dor di e incinerator y sin lubida cu mester por adapta e tarifa cu ta cobra consumidornan, sea domestico y comercial, pa procesa nan desperdicio.
Maske cuanto Minister Otmar Oduber kier pinta su proyecto bunita y beneficioso pa pueblo, e berdad ta completamente otro. Un hende mester paga pa e mey biyon florin cu lo mester inverti den e aventura aki. Gobierno a bisa mesora cu nan lo no paga, pues e ora ta comunidad lo hay’e cu e recibo presenta, pa paga 3 of 4 biaha mas halto pa procesamento di desperdicio.
Pa loke aspectonan di medio ambiente, e proyecto di incineracion di Minister Otmar Oduber tin hopi desventaha y ta liña recta contra e plannan pa bin cu un “circular economy” cu tanto Gobierno ta boga pe. E proyecto ta pendiente pa haya aprobacion di Parlamento sin cu Gobierno mes a laga traha un estudio di impacto ambiental y economico pa un empresa renombra. Esunnan cu ta apoya e proyecto di Minister no ta imparcial y nan tarea ta limita na incineration y con pa hustifik’e.
