Gobierno: Marina Real lo controla costa pa ilegalnan

E tabata un discusion andando pa algun luna caba, specialmente despues cu Parlamento a hala atencion di Minister mr. Andin Bikker riba su intencion pa duna Hulanda mas autoridad den husticia na Aruba. A purba tur forma pa infiltra den Polis via RST, den Migracion via Marechaussee, den DIMAS via IND y e ultimo recurso awor, via Marina Real. E tempo aya e mandatario a para tur cos y a laga Polis cu e autoridad necesario pa cuida costanan. Pero dor cu un boto a logra drenta weekend toch, awe mainta Prome Minister a anuncia cu e ta pidi asistencia militar mes pa cuida nos costanan.

ADV

Di e forma aki e idea inicial di Minister Andin Bikker lo continua, esta pa laga Mariniersnan cuida nos costanan pa evita cu stranheronan ta subi tera na un forma ilegal. Separa cu kier djis bin Aruba pa un miho porvenir, e ultimo biahanan aki a siña nos cu algun di nan sa trece droga y arma. Riba dje ainda tin e tema di traficacion di hende, esta cu ta cobra Venezolanonan den necesidad, bou engaño cu aki cos lo ta miho, pa ora nan ta na Aruba nan realisa cu e situacion ta diferente na locual a pinta pa nan na Venezuela.

Gobierno: Marina Real lo controla costa pa ilegalnan

Gobierno: Marina Real lo controla costa pa ilegalnan

Posted by 24ora on Monday, June 10, 2019

Hecho ta cu Gobierno di Aruba ta consciente cu e crisis di Venezuela a bira un crisis mundial caba y cu mundo henter mester lidia cune. Aruba ta haciendo su rol caba, pero ta imposibel pa un isla asina chikito di apenas 110 mil habitante, por maneha e demanda for di mas di 40 miyon habitante bibando dilanti nos cas. Ta pesey ta necesario pa pecura pa cera nos costanan miho, cu hende, material y experiencia necesario. Ta den e cuadro ey a dicidi cu Cuerpo Militar mester tuma e responsabilidad ey over for di Polis y Warda nos Costa.

Den pasado Parlamentarionan Rooc Tjon y Robert Candelaria a hala atencion di Minister Bikker debi cu Militarnan no tin e autoridad pa actua manera cu Polis si tin. A cuestona dicon no por ekipa Polisnan miho, cu mas ley y mas personal, enbes di entrega parti di nos autonomia hudicial na Hulanda. Pero, e realidad di awendia probablemente ta demostrando diferente. Un Cuerpo Policial demotiva, cu tanto problema den top, cu un Warda nos Costa debilita pa problema den top y falta di ekipo y riba dje un Kust Surveillance debilita pa autonan cu nan mes a kibra tras di otro. Banda di esey tin Kustwacht y Marina Real cu si ta conta cu ekipo y fondonan necesario di Hulanda pa duna un man, unda cu nos mes no por.

Probablemente ta cu e realidad ey den mente Prome Ministe Wever a dicidi awe mainta cu esey mes ta e rumbo cu nan lo kier bay. El a aclaria cu Hulanda a pone 23.8 miyon Euro disponibel pa Corsou y Aruba relaciona cu e problematica cu Venezolanonan. Na ningun momento e placa ey tabata pa traha edificio of luga pa cera hende, sino mas bien Hulanda kier cuantifica su ayudo den placa.

Mester pensa den e gastonan adicional di Kustwacht, e ayudo cu IND ta brindando na DIMAS pa maneha peticionnan di asilo y asina por sigui menciona. Pues lo no yuda cu placa, sino lo yuda cu trabou. Asina mes Aruba ta trahando un lista di necesidadnan cu lo entrega na Gobierno di Hulanda pa mira ki parti toch lo por yuda Aruba pa extra fondo pa trabounan adicional andando pa frena yegada desproporcional di Venezolanonan na Aruba.

Comments

comments