Pa por logra e “surplus” y mantene e presupuesto di pais Aruba den balansa pa otro aña, lo haci varios ehercisio financiero. En bez di corta den gasto, manera CAft a conseha tur Gobierno, toch ta opta pa e caminda di mas facil, aumenta entradanan. Un di e fuentenan di entrada pa Gobierno otro aña lo bira fondonan di mercadeo di Aruba Tourism Authority NV (ATA), unda lo kier pa e organisacion manda 35 miyon florin pa Gobierno.
Cu e decision aki, ATA ta hay’e ta maniobra y adapta su presupuesto cu ya ta cla caba pa otro aña. Esey ta nifica un cambio hopi drastico den nan forma di maneha mercadeo di nos pais internacionalmente. Varios evento y stuntnan di PR lo mester cancela debi na e reduccion substancial aki den nan presupuesto y fondonan disponibel.
Te ainda AHATA no a emiti un comentario riba e decision aki, aunke nos a compronde cu ya nan a reuni cu ATA caba y a informa nan di nan preocupacion. AHATA a subraya cu e fondonan di mercadeo a bini di acuerdonan conhunto entre AHATA y ATA cu a aloca fondonan hunto. AHATA e tempo aya a distancia di fondonan cu tabata bay na nan pa haci mercadeo cu awor ta bay completamente pa ATA. A cambio AHATA a haya tres miembro den Hunta di Supervision, pa garantisa cu e fondonan ta bon aloca.
Pero nan no por a spera nunca cu ta bin un Gobierno pa absorba mas di un tercera parti di e fondonan disponibel pa mercadeo di Aruba, pa por hinca den e caha di Gobierno pa cubri gastonan regular di operacion. Dialuna awo AHATA lo reuni cu Gobierno riba e tema aki pa ey tambe informa nan di e preocupacion reinante.
Fuentenan den turismo a sigura cu e “timing” di Minister Xiomara Maduro ta totalmente robes, teniendo cuenta cu precisamente awo mester mercadea mas, debi cu ocupacion na Aruba a nivela. Despues di como 2 aña di bonansa, debi na horcan cu a pasa den Caribe, destruyendo varios hotel, cu awor tur ta kedando cla y e mercadonan a habri bek pa turismo. Precisamente awo, por ehempel luna pasa na october, a mira con nos no tabatin crecemento mas y cu cifranan a bira “flat”.
Ora cu awo e sector turistico ta cla pa emiti campañanan promocional grandi pa purba sigui atrae e turistanan cu a haya nan obliga di bin Aruba e ultimo añanan debi na scarsedad di camber den Caribe, cu net awo nos ta corta den presupuesto di ATA. Siendo e pilar economico mas grandi di nos pais, e cortamento aki lo afecta nos economia directamente!
