Gobierno lo no subi Reparatietoeslag ni Onderstand ora subi BBO

Den nan anuncio di e aumento di BBO, Gobierno a bisa cu lo compensa esunnan di menos recurso pa aumento di costo di bida causa door di aumento di BBO te cu 6% y aumento riba accijns riba gasolin. E ayudo aki lo a sosode door di un aumento di e entrada di e grupo aki door di subi reparatietoeslag y onderstand. Sinembargo, den e presupuesto cu Gobierno a entrega na Parlamento e siman aki, Gobierno no a presupuesta ningun aumento di reparatietoeslag y a presupuesta un aumento minimo di onderstand.

E presupuesto ta inclui si e aumento di BBO, BAZV y accijns riba gasolin cual hunto ta resulta den un aumento di entrada pa Gobierno di 83 miyon florin e aña aki y 166 miyon florin desde proximo aña.

Manera menciona e presupuesto di reparatietoeslag ta keda mescos cu na 2017, esta na 36.5 miyon florin. E presupuesto pa onderstand ta aumenta cu apenas 500 mil florin, esta di 25.5 miyon florin pa 26 miyon florin, locual lo significa un aumento di alrededor di 15 florin pa luna pa cada famia cu ta ricibi onderstand.

E presupuesto aparentemente lo wordo trata den transcurso di otro siman, mirando cu ta intencion di Gobierno pa keda cla cu tratamento di presupuesto prome cu fin di e luna aki.