Despues cu pensionadonan a bay den panico pa e decision pa kita 125 florin di Reparatie Toeslag pa luna for di nan pensioen, awe Conseho di Minister a dicidi di hala tras nan decision tuma dia 22 di mei 2018 pa elimina e beneficio aki na un cantidad di pensionado. Tur esaki den cuadro pa baha gastonan den presupuesto 2019. Cu e decision di awe, Gobierno lo mester di riba 10 miyon florin pa sigui cubri e bentaha financiero aki na nos grandinan.
Gobierno di Aruba a anuncia cu e aña aki lo elimina e Reparatie Toeslag di 125 florin for di pensionadonan cu tin un otro entrada banda di nan pensioen di biehes. Despues a evalua pa kit’e for di un parti di nan so. Esey lo a costa 6 miyon mas. Pero awor a opta pa evita cu lo kita di esun y di e otro no, pues pa mas miho politicamente, pa laga tur 20 mil pensionado cu e beneficio aki.
Awor e mesun coalicion di MEP-POR-RED mester bay Parlamento bek pa pasa un ley nobo pa elimina e ley di dia 22 di mei 2018 cu nan a pasa den cual ta anuncia e medida aki. Ta hopi obvio cu Parlamento a vota na fabor di un ley cu nan no a ni lesa drechi of tabata consciente si e enbergadura y consecuencia.
Unda lo saca e mas di 10 miyon florin di gasto adicional den presupuesto 2019 no ta conoci. Hecho ta cu CAFT ta pendiente pa aproba e Presupuesto cu e mesun Parlamento aki a pasa na december ultimo, den cual a conta caba e reduccion di reparatie toeslag na pensionadonan. Awor ta cuestion di baha otro gasto cu 10 miyon of aumenta impuestonan cu algo mas cu 10 miyon florin pa e aña aki.
