Gobierno lo fungi como facilitado di Vision Economico

Ministerio di Asuntonan Economico y Finansas, a bin ta trahando riba loke lo bay bira un fundeshi pa locual tin cu bira e Vision Economico di nos pais.

Minister Xiomara Ruiz-Maduro a splica cu na momento cu a bin cambio di gobierno, e prome tarea importante tabata e parti di finansas publico, pa eynan saca cabes riba awa.Pa por haci e parti aki mas sostenibel, trabao, energia a wordo hinca den esey. Pero a yega momento cu economia di nos pais tambe mester por conoce e cambionan.

Pa e cambionan aki tabata necesario traha un fundeshi fuerte. Durante e conferencia di prensa semanal di gobierno e mandatario a splica cu den e Vision Economia di pais Aruba, mester ta uno fuerte, pero tambe resiliente.

Dicon resiliente?

Nos ta un comunidad asina chikito, un economia asina chikito, den un mundo asina grandi. Un economia manera nos tur sa, manera cu por ehempel na Merca, nan niester, nos aki na Aruba, ta bira malo.

Pesey no por evita di por haya shocknan di exterior, pero si, locual cu tin den nos man ta pa por traha si riba e condicionnan cu aki na Aruba por brinda nos, di por traha un fundeshi duro, y asina tin proceduranan tambe, cu si algo pasa, nos por lanta bek.

Desde 2015, realidad ta cu e economia na Aruba ta tranca. Esaki ta tranca pa diferente motibo pero si uno principal ta, cu nos tin cu realisa cu e megadebe tin su consecuencia pa e economia di nos pais. Esaki ya caba for di 2011, Banco Central, den su rapportnan tabata indicando cu e debe y e deficit grrandi cu nan ta mirando den presupuestonan di pais aruba, ta bay trece consecuencia cun’e economicamente. Pesey desde di e tempo ey, nan a bin ta indicando caba pa no sigui crece e debe, pasobra e debe aki ta bira bek y ta press bo economia.

No ta Banco Central so a indica esaki, pero IMF tambe.

Den su rapportnan el a trece dilanti cu economia di pais Aruba, un economia asina chikito y vulnerabel pa shocknan, no por permiti pa tin un gobierno cu un debe halto.

Esaki ta pa asina cu pasa 60% di e debt to GDP, esta e debe y tur loke ta produci como pais, esta di cada 1 florin, 60 cent ta pa paga debe, ta tranca e economia.

Mas cu claro, gobierno a wak un economia di nos pais, of un finansas publico di nos pais, caminda cu a bay di 49% di nos debt to GDP, pasa bay 90%. E 90% aki, claramente a pone e ora eynan cu e economia di nos pais desde 2015 bin ariba, a bay atras.

Pesey ta caminda cu nan ta awor aki. Pesey e rapportnan tambe ta indica cu awor aki gobierno tin loke ta bira e consecuencia di e megadebe riba nos economia.

Maneho di inversion

Desde cu gobierno aki a bin na mando, nan no a sinta keto. Departamento economico a keda traha riba e blokinan necesario, pa por yega na un vision economico pa e pais aki fuerte y resiliente.

Ta importante pa indica cu Gobierno su rol den tur esaki, lo ta facilitador. Facilita e comerciante pa haci comercio aki na Aruba, pa asina por haya pusha economia.

 

Den e maneho di inversion no ta mustra e vision di un solo minister. A scoge pa bin y sigur cu consehonan cu a haya tambe ora cu a bishita locual ta oficina di Inversion exterior na Hulanda, a recomenda pa bin cu un facilitador internacional, y esey ta loke cu gobierno a haci tambe. Na Mei a trece tur stakeholder hunto, pa asina bay defini cual ta e sectornan cu ta prometedor pa yuda economia di e pais aki crece.