Durante tratamento di Presupuesto Supletorio 2018, a bin varios pregunta den direccion di Minister Chris Romero relaciona cu desaroyo di e Proyecto Fast Ferry. El a anuncia cu lo firma un MoU entre Aruba y Corsou pa manifesta e intencion di desaroya e Proyecto Fast Ferry dia 21 di December benidero. Minister Steven Martina di Corsou lo bin firma e documento aki na Aruba.
Minister Romero ta pushando duro pa e proyecto di Fast Ferry bira un realidad, un manera mas economico di trafico entre Aruba y Corsou, cu lo traduci den un aumento positivo di turismo pa y di nos pais y lo crea extra entrada economico.
Na luna di augustus ultimo, durante un reunion entre Gabinete Rhuggenaath y Gabinete Wever-Croes na Corsou, a acorda cu lo firma un MoU (Memorandum of Understanding) unda ambos pais ta expresa e intencion di desaroya e proyecto Fast Ferry entre Aruba y Corsou. A ratifica dicho palabracion den Conseho di Minister di Gobierno di Aruba y Corsou.
E siguiente paso ta pa cada Gobierno instala un comision multidisciplinario pa atende cu e trabounan di preparacion relaciona cu e proyecto. Den futuro lo instala un comision mixto entre Aruba y Corsou.
Minister Chris Romero a expresa di ta hopi complaci pa mira cu tur cos ta canando positivo pa e proyecto di Fast Ferry entre Aruba y Corsou.
