Relaciona cu e problema cu holor stinki di gas cu ta penetra riba waf di carga na Barcadera, Prome Minister mr. Evelyn Wever-Croes awe a anuncia cu probablemente WEB lo soluciona e problema dor di cumpra otro heavy fuel oil. E lo ta mas caro y lo mester mira con ta comparti e gasto aki pasobra “pueblo so no lo por paga pa aumento di awa y coriente”.
Prome Minister mr. Evelyn Wever-Croes a caba di regresa di su vakantie na Cuba. El a tene un conferencia di prensa awe pa duna un “update” di varios asuntonan coriente. Un di nan tabata e problema di gas cu ta molestia trahadonan di ASTEC, di Cuerpo di Aduana, Migracion Aruba, Polis y chauffeur di trucknan di carga cu ta traha riba waf.
Parce cu por logra un solucion den 6 siman caba ora cambia e heavy fuel oil cu ta uza awendia pa produci awa y coriente. Pa mas barata e ta contene hopi sulfur den dje. Menos sulfur bo kier den e petroleo, mas caro e ta bira pa cada bari. Con caro no sa ainda, pasobra Refineria di Aruba (RDA) ta encarga cu cumpra y bende e productonan aki na WEB Aruba N.V.
Un cos si Gobierno ta sigur, cu no ta pueblo so mester paga pa e gastonan extra pa cumpra otro heavy fuel oil. E ta pensa den comparti e gasto aki cu “otro partnernan” tambe envolvi den e motibo pa cambia di producto. Por compronde si cu un di e partnernan potencial envolvi aki ta APA y ASTEC. Den caso cu hisa e gastonan di operacion di ASTEC pa motibo di WEB, esey lo por traduci den aumento den prijs di maneha carga riba waf, cu lo afecta nos economia directamente.
