Gobierno kier referendum riba aumento di tarifa di Taxi

Minister Chris Romero ta kere den dialogo cu Taxistanan, pero e bondnan mes no ta riba e mesun liña. Y ta e desaroyo aki mes ta causando bruhamento. E mandatario ta pensa di organisa un referendum entre Taxistanan mes, cu e tema di aumento di tarifanan. Segun Minister Chris Romero, a acerca AHATA tambe pa un sondeo.

Un otro grupo a acerca e Minister cu si nan bin cu e lista di prijs aki, nan mes lo entama un caso den Corte contra Gobierno. Ta full un bruhamento tin den otro. Pesey no mas tarda cu den dos siman, lo tuma un decision concreto relaciona cu tarifanan di Taxi.

Referendum

E Minister a splica cu a pidi pa AHATA yuda haci un sondeo pa nan mesun bon, pasobra si ta asina bo no por bay duna un Taxista mal nomber. Si bo bay aumenta e prijs drasticamente, turistanan ta bay cuminsa papia cu Aruba ta caro y ta miho pa huur auto. Ken ta bay sufri despues…ta Taxistanan, si outprice nan mes. Of nan ta cuminsa uza otro medionan di transporte. Esaki ta locual un grupo di Taxista a bisa e Minister. Cu si bay hisa e prijs na tal manera, ta nan mes ta wordo perhudica despues.

Minister dispuesto pa aumenta tarifanan

Minister Chris Romero kier duna Taxistanan un aumento di tarifa, pasobra ta for di mas cu 8 aña pasa cu nan no a haya aumento, nan merece di haya algo. Pero e mester ta responsabel caminda cu no ta perhudica nan mes, pero tampoco perhudica e otronan cu no kier e aumento eigenlijk. Esey tambe tin. Tin un grupo, cu no kier un aumento y si e bay drasticamente, nan mes ta bay lanta caso contra Gobierno, segun Minister Chris Romero.

Taxistanan pirata

Taxistanan pirata ta e keho di mas grandi di e taxistanan. Minister Romero a splica cu taxi pirata no ta cay bao di DTP. Autonan “A-wagen” ta cay bao di husticia. Esey ta un concepto cu e Minister ta kere cu eyfo mester wordo cambia. DTP ta transporte y Taxi pirata ta trafico. Trafico ta cay bao di husticia. Esey no ta nifica cu Minister Romero no lo haci nada. Minister Romero a sinta cu su colega Bikker, hunto cu Polis y DTP y a forma un comision pa evalua posibilidadnan con ta bay actua, e diferente sancionnan cu ta bay wordo poni, etc.

Taxi pirata ta un fenomeno cu ta presente rond mundo y ta dificil pa deal cun’e.

Autobus

Chauffeurnan di autobus tambe ta grita. A sinta cu un grupo caba. Tin mas grupo kier sinta y esey ta e siguiente paso. Tin diferente pida pida grupo cu kier wordo scucha. Esey ta loke e Minister a bisa di ta haciendo. Realidad ta cu e ta asina hopi, manera cu ta menciona y e ta tuma su tempo. No por yega tuma un decision asina iresponsabel. E mester ta algo concreto, studia y percura pa haci’e bon. Minister Romero no ta bay tuma un decision ad hoc. E mester ta bon studia, bon argumenta, preto riba blanco, e ora e ta tuma e decision, segun Minister Chris Romero.