Gobierno kier kibra contract cu operador di Lotto

Oficina principal di Canadian Bank Note na Ottawa, Canada

Gobierno no ta na fabor di e contract cu Canadian Bank Note (CBN) y lo kibra e acuerdo aki, pasobra e no ta beneficioso pa Aruba. “E ta parti di nan plan di campaña y ta para den nan acuerdo di gobernacion”, asina abogado mr. Anthony Ruiz a anuncia awe durante tratamento di e caso cu e Hunta di Supervision di Fundacion Lotto pa Deporte a entama contra Minister Dangui Oduber y Gobierno di Aruba. Mester bisa cu e Gobierno di Aruba y e Hunta di Supervision di Lotto a caba di adapta e acuerdo ey mas o menos 1 aña pasa, di cual Aruba ta haya mas placa pero a alarga e contract.

“Por kibra tur contract, pero e tin su prijs”, asina un otro abogado, conoci pa atende casonan corporativo a bisa nos pafo di Corte ora a puntre si ta posibel cu e Gobierno nobo por kibra e acuerdo existente cu CBN. No ta conoci si Gobierno a analisa e contract cu CBN caba pa por deduci cuanto e “buy out” ey lo sali.

Bishita di Minister Alex Schwengle y delegacion di directiva di Fundacion Lotto pa Deporte na Canadian Bank Note, den cual e mandatario a informa nan cu lo adapta e contract y haci’e mas benedicioso pa Aruba.

Di otro banda, un politico di partido AVP a bisa na radio algun dia pasa caba cu e plan di MEP ta conoci, pa saca CBN for di Lotto pa hinca e sponsor principal di e Minister, cu tambe ta den negoshi di loteria, pa lag’e maneha Lotto. E ta un diferencia grandi si, comparando cu CBN ta organisa loteria den 13 isla den Caribe y ta un compania solido di hopi aña, compara cu un catochero local. E politico a hasta sigura cu e oficina principal di campaña di e Minister actual tabata den edificio di e comerciante/catochero aki.

Oficina principal di Canadian Bank Note na Ottawa, Canada

Cu e anuncio awe den Corte di abogado Ruiz, den representacion di Minister Dangui Oduber, ta hopi cla kico ta e destino di Canadian Bank Note den Lotto di Aruba. E caso ey tambe lo ta interesante pasobra e relacion cu CBN a cuminsa desde 1999 caba y tabata na 2011 cu a estrecha e lasonan mas ainda ora cu e loteria di Aruba a confronta problemanan financiero serio.