Gobierno informando Parlamento di fiansa di Hulanda

Awe a tuma luga e reunion di Parlamento unda cu Gobierno por medio di Minister di Finanza Xiomara Maduro y Prome Minister Evelyn Wever Croes a duna un splicacion di e prestamo of ayudo financiero cu a haci na Hulanda den e periodo di crisis aki.

Minister di Finanza a splica di e diferente programanan cu a bini cu ne y Parlamento tabata kier sa di e condicion y acuerdonan cu a yega cu Gobierno Hulandes riba esaki. Tabatin hopi pregunta y e reunion den oranan laat di atardi pa anochi ainda esaki tabata andando.

A bini dilanti loke cu tabata demanda di Hulanda pa reduccion di gastonan, di personal cu 85 miyon florin. Y di e gastonan di operacion cu a aumenta desde 2017 a corta esaki cu solamente 9.7 miyon. P’esey por ehempel pregunta di fraccion di AVP, segun Richard Arends, tabata kier sa kico tabata e reformanan cu Hulanda ta pidi, cual ta e condicionnan impone, pa bini na remarca pa e di tres y di cuatro tranche di ayudo. “Hulanda cada biaha ta haci e condicionnan mas estricto y mester sa kico ta palabra pa haya e financiamento y cual ta e recortenan,” Arends a bisa.

Gobierno informando Parlamento di fiansa di Hulanda

Gobierno informando Parlamento di fiansa di HulandaClick link pa mas: https://24ora.news/305no5L

Posted by 24ora on Wednesday, June 3, 2020

Dellanire Maduro, lider di fraccion di partido POR , a keda satisfecho cu a informacionnan duna te e momento ey. Aunke si el a bisa cu e reduccion di 65 miyon florin pa luna den gastonan di AZV ta hopi pisa, di otro banda tur hende tabata sa pa un tempo caba mester adapt’e. Esaki pasobra e poblacion no ta creciendo, mas bien ta enveheciendo. Banda di esaki e enfermedadnan cronico y obesidad ta hopi prevalente na Aruba. “Mester atende cu e condicion y problemanan aki, pero den forma responsabel, gradual y den fasenan,  pasobra e lo tin su impacto riba e poblacion.”

Minister Xiomara Maduro a haci su introduccion den oranan di mainta, splicando tur kico a haci, mientras cu den oranan di merdia pa atardi a duna contesta na preguntanan haci, pa despues Prome Minister tambe duna algun contesta.

Parlamentario independiente Daphne Lejuez, kende a splica su atencion mas bien tabata riba e proceduranan sigui ora cu a declara COVID-19 un crisis, con a atende cu esaki, y cuanto mas ta bay sigui e ley di calamidad. Principalmente con ta inclui e proceso democrático aki si mira cu COVID-19 lo bay tey pa basta tempo. E ta sperando di por haya contesta di su preguntanan den di dos tanda cu mester a cuminsa den oranan di atardi.