Gobierno evaluando pa bin cu “vermogensbelasting”

Vermogensbelasting ta un belasting riba placa cu sea bo a spaar, tin na accion (shares) den compania y placa cu bo tin na propiedad. Durante un presentacion di Reforma Fiscal cu Gobierno a haci na comercio a anuncia varios medida cu ta den tapara. Algun kier introduci desde 1 di januari 2020 y otronan e aña aki ainda. Un di e medidanan anuncia ta introduccion di un belasting nobo, e asina yama ‘vermogensbelasting’ cu te dia di awe nunca tabata existi na Aruba. Esey ta belasting riba e placa cu bo tin na capital y tambe na propiedad.

Capital ta e balor di bo propiedadnan kitando bo debenan. Tur e placa cu bo a spaar durante añanan largo, bibando den forma modesto sin gasta mucho placa na luho, parti di dje awor ta bay pa caha di gobierno, esaki di acuerdo cu e reformanan cu Gabinete Wever-Croes ta considerando pa introduci.

Expertonan ta teme cu pa e pensionadonan e lo ta un sla duro, mirando cu nan a spaar añanan largo pa nan por biba un bida husto durante nan behez y awor riba e placa ey nan mester paga belasting. Gobierno a bisa di lo baha  e tarifa di e inkomstenbelasting. Den caso di e pensionado, esaki no ta yuda nan na nada, pasobra ya mayoria no tin entrada mas. Es decir e reduccion lo no conta pa nan, pero si nan lo haya e peso di vermogensbelasting. Na Hulanda esaki ta 30% riba e rendimiento di bo vermogen.


Te ainda gobierno no a anuncia cuanto e porcentahe ta bay ta di e vermogensbelasting aki. Na Hulanda p.e. e belasting aki ta wordo dividi den categoria. Mas capital bo tin mas halto bo vermogensbelasting ta. Tambe Hulanda ta funciona hopi diligente den su forma di cobra belasting. Nan ta fiha un tarifa riba un suma ficticio cu nan ta calcula cu bo rendemento ta, si bo a alcansa esey no ta relevante. E ta worde cobra a base di un “fictieve aanname”.

Specula awor cuanto e vermogensbelasting ta bay ta no tin sentido tanten cu no sa e porcentahe cu gobierno ta bay pone riba e belasting nobo aki pa Aruba. Loke si ta sigur ta cu e belasting aki ta bay pisa hopi riba esnan cu tin “vermogen” cu nan a crea durante tempo na spaar, propiedad of inversion. E extra belasting aki specialmente riba e pensionado cu a spaar henter su bida lo por ta un sla duro.