Den un carta data 6 di januari, e sindicatonan SEPPA, SIMAR, SPA, SADA y FTA a dirigi nan mes na gobierno un biaha mas pa adresa e recorte di 12.6% y nan proposicion pa traha menos ora. Ya ta pa algun luna caba cu e desacuerdo aki ta tumando luga. Por a tuma nota aña pasa di varios accion y manifestacion di parti dje trahadonan publico conhuntamente cu e sindicatonan, den cual a protesta riba e recorte aki, cu nan ta considera inhusto. Inicialmente, gobierno a splica cu e recorte aki tabata necesario y mas bien un muestra di solidaridad p’e otro ciudadanonan cu a perde trabou riba nos isla den e pandemia. Riba e iniciativa aki, a start cu FASE y loonsubsidie.
Sinembargo, ya den november a bin tende cu ta bay para tanto e FASE como e loonsubsidie, sinembargo no a menciona cu ta bay para e recorte aki. Esaki mas cu claro a trece confusion den e trahadonan y e sindicatonan ya cu nan ta no ta compronde dicon mester sigui corta den nan salario. Riba esaki, gobierno a splica cu e recorte aki ta mas bien un condicion di Hulanda pa Aruba por sigui haya sosten likides.
Un biaha mas, e sindicatonan a recorda gobierno cu desde un principio nan a pone un condicion riba mesa cu e trahadonan cu ta entrega mester haya un compensacion di tal forma, conforme e pago. Pa esaki, ta bolbe lamenta cu gobierno ta dicidi di retene e recorte y awo nan mes ta propone pa traha menos ora den un forma ekivalente cu e entrega di 12.6%. Entrante prome di februari nan ta bay traha 2 dia menos pa luna. A recorda tambe cu gobierno a permiti reduccion den salario bay man den man cu reduccion den ora di trabou p’e sector priva, pero pa esun publico no. Esaki ta algo inhusto segun e sindicatonan y ta parce mas un sancion desproporcional.
Tambe e sindicatonan a referi na articulo 8 di e Lansverordening tijdelijke versobering bezoldigingen en voorzieningen overheid, den cual ta trata e obligacion di goberino pa entre un relato por escrito di e efectividad di e reduccion temporal di salario.
Gobierno a reacciona riba esaki den un carta dirigi n’e sindicatonan en cuestion bisando cu e sindicatonan ta basa nan decision riba varios ponencia incorecto. A splica cu gobierno ta mantene e argumento cu e recorte den ambos sector ta exigencia di Hulanda, cu gobierno ta publica informacion financiero di recorte y cu e recorte en cuestion huridicamente no ta un sancion.
Pa loke ta e propuesta di laga e recorte di 12.6% y a cambio traha menos ora, ekivalente na esaki, ta algo cu gobierno ta dispuesto pa considera. Un biaha mas gobierno a bolbe extende su invitacion na tres representante di e sindicatonan pa un reunion cu e comision financiero dialuna dia 10 di januari pa 3:00pm.
