Recientemente a start na Peru e “Juegos Panamericano Lima 2019”. Un total di 41 pais ta participando, 6680 atleta, 39 deporte y 62 disciplina y sin lubida 12 mil boluntarionan ta entre otro algun cifra pa ilustra e magnitud pa organisa Juegos Panamericano. Gobierno Peruano a inverti 1.1 biyon dollar Mericano, tanto den infrastuctura di pais, como tambe den construccion di un serie di facilidadnan deportivo. Desde aña 2016 e trabounan a inicia y esaki a percura pa alrededor 500.000 cupo di trabou.
Inversionnan di mas grandi por ehempel tabata e Village esta Villa Panamericana unda atletanan a keda. Esaki so tabata un inversion di 155 miyon dollar Mericano. E ta consisti di 7 edificio (toren) di 19 y 20 piso cada un y un total di 1096 departamento.
Despues cu e Juegos Panamericano pasa, Gobierno lo bende nan cu Mi Vivienda cu ta e departamento cu ta percura pa casnan pa pueblo kende lo percura pa bende esaki nan. Banda di esaki a traha masha hopi complehonan deportivo hopi moderno. Por ehempel na Villa Maria del Triunfo a traha un compleho na balor di 110 miyon dollar Mericano unda den e compleho aki tin 2 stadion di softball ultra moderno, 1 stadion di baseball, 1 stadion di Rugby, 1 stadion di Hockey y un zwempool pa waterpolo, mas un cantidad di oficina.
Den tur e trabounan multimiyonario aki Gobierno a contrata e compania New Engineering Contract ( NEC) for di Inglatera, un compania renombra den e materia aki mundialmente cu ta pinta mapa, haci y guia trabounan civil y construccion y ta resolve tur problema den tempo record y percura pa trabounan keda entrega na tempo.
Na final di e evento IPD, e Instituto Peruano de Deporte, lo haña mayoria facilidadnan bou su hala pa nan mantene y maneha. “Return on Investmnent (ROI) tambe a wordo calcula unda por ehempel fanaticada y turismo cu lo jega Peru pa e 17 dianan di competencia ta calcula un ingreso na balor di 250 miyon dollar Mericano. Tambe, e 500.000 cuponan di trabou cu a crea tambe tin su balor. Ainda no ta inclui e balor di mehoracion di e imagen di Peru cu lo añadi despues.
Asina tin hopi factor cu ta determina e ingreso cu e inversion biyonario aki lo trece cune. Deporte ta keda un vehiculo special unda inversion den deporte ta crea caracter y yuda forma un miho persona pa futuro alabes ta uni henter un pueblo. Un inversion den deporte ta un inversion den futuro di Bo pais.
