Meta di Selikor (Servicio di Limpiesa di Corsou) ta pa tur sushi cu Corsou ta produci pa esaki yega na un destinacion final cu ta na nan landfill na Malpais, segun managing director, Wesley Kook.
E ta sigui splica cu como Selikor mes ta brinda tur e facilidadnan aki pa por hiba un maneho responsabel, eficiente, pero tambe tene na cuenta cu medio ambiente. Tambe pa ta e manera di opera, no mester trece molester pa habitantenan, pa trafico of cualkier otro ciudadano.
Sushi di cas por ehempel ta un servicio cu Selikor ta duna, caminda cu ta opta pa recoge sushi di cas na e localidad un biaha pa siman.
Sushi di cas ta un servicio colectivo. E ta mesun cos pa tur hende. Empresanan por opta cerando un contracto cu Selikor, pa e ora ey Selikor por duna un servicio na midi. Eynan cada empresa por opta e dia cu kier pa bin busca e sushi y tambe e cantidad di biaha pa siman cu nan kier pa recoge sushi, depende di nan necesidad.
Dimes tin e posibilidad tambe caminda cu e hende cu e mes kier hiba su sushi na e landfill, nan por haci esaki. E ora na landfill tin un cargo cu ta cobra pa esnan cu bin trece sushi nan mes.
E cargo aki ta 30 florin pa cada mil kilo cu trece, di cual cu durante un aña no surpasa e mil kilo ey, e 30 florin aki no lo wordo cobra.
Ta considera un hende cu bin mas cu un biaha of e bin cu mas cu mil kilo, cu no ta un cantidad di sushi di cas el a trece, sino un sushi di empresa, of un cantidad cu toch ta considerabel cu Selikor mester cobra e gastonan cu tin pa procesa e sushi ey.
Selikor ta purba si pa mas y mas e hendenan bira conciente y pa no trece mucho sushi of a lo menos si dado momento nan por trece e sushinan separa di tal manera cu por usa esakinan di nobo, e ora den un caso asina, no ta cobra pa e sushi cu nan trece.
Ta papia aki di por ehempel, si tin hopi boter di glas selecta y trece nan, tin un localidad cu ta yama Caya di Medio Ambiente, caminda e ciudadanonan por deposita e material separa ey, e ora e ta bira gratis.
Tambe tin un facilidad caminda cu ta procesa sushi di construccion. Esaki ta manera bloki, santo, cosnan cu na e localidad tin mashinnan cu ta kibra y sefta e materialnan aki y haci nan disponibel pa nan por wordo reusa den construccion.
Pa e sushinan aki tampoco no ta cobra basta nan bin selecta y limpi. Nan no mester ta contamina cu otro sushi.
Plastic tambe ta tuma separa. Metal tambe ta tuma separa den combinacion cu e compania cu ta procesa e metalnan aki, manera auto bieu, hero, tur sorto di metal. Eseynan ta wordo corta chikito y tempo tempo nan ta exporta nan pa exterior.
Pero asina ta purba di hiba toch un maneho completo caminda mas y mas kier motiva e habitante pa e anda conciente cu e sushi. Haci uso di e facilidadnan, pero tambe si bo mes ta anda cu sushi, anda na un manera responsabel, pa evita contaminacion, evita molester y simplemente pa cuida toch e medio ambiente cu ta biba aden.
