Gobierno di AVP a pone existencia di The Cinemas na peliger

No ta di awor, sino for di aña 2016 caba cu The Cinemas di MetaCorp ta haciendo tur lo posibel pa logra un tereno pa construi un edificio pa muda The Cinemas @ Paseo. E intencion di e compania ta pa desaroya un modelo nobo y moderno den Caribe, cu salanan mas espacioso, cu calidad di pelicula superior y zonido sin igual. Lamentablemente, e Gobierno anterior di Partido AVP a haci tur esfuerso pa obstaculisa e proceso te cu no a honra e compania e peticion pa tereno, ni unda nan a pidi ni na ningun otro luga mas. Consecuentemente a haya nan awor den un preta cu Paseo Herencia, cu via Corte a obliga nan di bandona e edificio aki dos siman, di cual mas cu 10 empleado awor a perde nan trabou.

Den un decision di Corte recientemente a dicidi cu pa dia 15 di september 2018, The Cinemas mester sali for di e edificio, cu entretanto a opta pa huur e salanan cu Caribbean Cinemas, cu awor ta na Palm Beach Plaza. Di e forma aki e compania stranhero ta probecha di e oportunidad cu The Cinemas tin menos sala disponibel, pa nan mantene e mercado of, den cierto forma, crece nan mercado, cu awor ta consisti di solamente 6 sala.

Mas cu un decision comercial, E. de Veer Chain Theater ta e prome negoshi di famia de Veer, cu a inicia na Aruba na aña 1920, pues ta apunto pa celebra 100 aña di existencia. Un compania cu despues di cine a desaroya den transporte, den refresco, cerbes, hoteleria, casino y mas. MetaCorp no mester introduccion y pio ainda hustificacion di cualkier Gobierno, incluyendo esun di AVP, pa por inverti riba nos pais. E compania dos aña pasa a sali for di e negoshi di hotel, shopping mall y casino. Ora a pensa cu lo por reinverti nan placa na Aruba mes den cinema y otro areanan, e Gobierno di AVP a haci tur intento pa pone obstaculo y no a otorga e permisonan necesario. A purba pa cambia e destinacion di e tereno unda antes tabata Drive Inn Theater, den un centro di entretenimento, incluyendo cine, pa e area di Santa Cruz y Pariba di brug. Aki tampoco, dos aña despues, nunca e Gobierno anterior no a ni contesta e peticion.

The Cinemas lo sigui opera pa e siguiente lunanan den Renaissance Marketplace cu 6 sala cu entretanto ta den renobacion total. E intencion ta pa traha un edificio nobo y moderno riba Sasakiweg, pero cu lo dura minimo 1 aña prome cu por keda cla. Si keda cla cu e tereno y permiso di e Gobierno actual, e proyecto lo cristalisa y lo por mantene e compania local di mas bieu di nos isla. Si no keda cla, e chens ta grandi cu e compania stranhero di cine lo por conkista e mercado local. No por keda sin observa, cu si e Gobierno anterior, si ex Minister Benny Sevinger a actua deligentemente y a otorga e terenonan necesario, awe lo por ta celebrando apertura di e edificio y celebra mas cupo di trabou. Awe e realidad ta otro y cu tristesa mester a laga trahadonan dinamico bay cas.