Un tempo pasa grupo di Olde Molen a anuncia cu nan tin interes pa deshaci di e club nocturno y cuminsa cu un proyecto di Boutique Hotel. Minister di Turismo, Dangui Oduber, a splica cu e grupo cu ta maneha e club nocturno Olde Molen, a haci un presentacion na e minister, di un concepto diferente di haci negoshi.
Nan kier deshaci di e club nocturno y kier bay den un desaroyo hotelero. Un boutique hotel. Banda di boutique hotel nan kier uza e molen como atraccion pa turistanan, haci’e un museo turistico, algo cu por bira sigur un bunita atraccion pa turista, si tin e molen ta banda di dje.
Un boutique hotel di 50 camber. Manera ta conoci, e maneho di ministerio di turismo, dirigi riba desaroyo di boutique hotel, semper tin cu tene cuenta cu e capacidad di carga pa mira cuanto hotel mas por desaroya na Aruba.
Pesey a opta pa bay e direccion cu ta habri pa desaroyo, pero desaroyonan chikito cu no ta pisa hopi riba nos sociedad. Gobierno ta full na fabor di e proyecto aki y ta sostene e proyecto aki 100%, pasobra na momento cu ta deshaci di un area, un establecimento cu a causa hopi problema den pasado y hasta morto a cay eynan.
Den pasado regularmente polis tin cu bay den e area pa problema, pa bringamento, abuso di alcohol, abuso di droga. Kiermen den e caso aki, na momento cu a haya e presentacion, a bisa e grupo aki cu nan por conta 100% cu sosten di gobierno, mirando cu e ta conforme cu e maneho y vision di gobierno.
Kico mas miho pa deshaci di un club nocturno cu a ocasiona problema pa local, pa turistanan, pa polis. E ta un overlast practicamente tur siman pa polisnan y ta converti e area, upgrade e den un boutique hotel.
A papi’e cu minister di infrastructura y ta spera cu por conta cu su cooperacion den e esaki. Full conseho di minister ta sostene e gobierno aki. Obviamente como gobierno ta sostene iniciativanan asina pasobra ta un area cu a causa hopi problema y ta converti e area aki den un proyecto sumamente bunita, cu ta bira un balor agrega pa nos turismo.
Un area cu e turista no tin molester mas. Polisnan no ta wordo molestia mas. Polis por dedica nan mes riba otro areanan pa combati criminalidad y ta haya un proyecto di calidad hopi halto. Esey ta e grupo a presenta no solamente boutique hotel, sino uno di un calidad sumamente halto.
Ta pesey e minister ta sostene e proyecto aki. E ta spera cu por conta cu cooperacion pa e proyecto aki bira un realidad, pa asina Olde Molen, e club nocturno pasa pa pasado y bin cu un boutique hotel.
Por wak’e den e area con The Mill a wordo upgraded pa courtyard, otro bunita proyecto. Ta muestra con inversionistanan ta kere den e maneho di ministerio di turismo, kere den economia di Aruba, pa keda inverti den dje.
Miedo
Un di e miedonan cu hende tin, tin biaha door cu tin mas hotel ta bay habri, e pregunta ta si uno ta ranca hende di otro. Segun minister Oduber, ta un preocupacion cu gobierno tambe tin. Pesey ta haci tur estudio cu ta necesario di e capacidad di carga cu ATA y APA ta haci.
No mester lubida cu ATA ta haci estudio riba turistanan cu ta yega Aruba via aeropuerto. APA ta haci estudio riba capacidad di carga di turistanan crucero. “Dado momento mester por yega na un cap, cuanto realmente e pais por carga y pa keda brinda e mesun nivel di servicio y e mesun experiencia na e turistanan.
Nos ningun riba e pais aki kier atrae turista y nan ta haya mal experiencia. Si nan haya mal experiencia nan no ta bin bek. E minister ta sinti cu tin espacio pa keda crece. E ta kere cu nos por crece, pero logicamente mester tene na cuenta si, cuanto mas nos mes como pais kier crece.
Segun e minister, ya caba si premira futuro, ta bisa cu pa e proximo cinco pa dies añanan, no kier wak un aumento di cantidad di camber riba 3 mil, por ehempel di hotel, ta kere cu den e direccion cu nos ta bayendo ta e direccion corecto, vooral via maneho di desaroyo estilo boutique hotel.
Aruba ta habri pa desaroyo, pero kier desaroyo di hotelnan chikito, no hotelnan grandi mas, manera di 200, 300, 500 camber.
Nos por sigui crece, pero desaroyonan chikito.
