Gobierno di Aruba, bou liderazgo di Prome Minister mr. Mike Eman, a anuncia un aumento di 250 florin pa luna den e reparatietoeslag pa tur pensionado, incluso esnan cu ta ricibi pensioen di huerfano y viuda. A tuma e decision aki despues di sigura e fondo financiero necesario den presupuesto. Director di SVb, ir. Edwin Jacobs, a gradici gobierno p’e aumento y a confirma cu SVb lo encarga cu e ehecucion di e pago adicional aki.
E aumento di reparatietoeslag ta un paso importante pa mehora e poder di compra di e pensionadonan, specialmente esnan mas vulnerabel den nos comunidad. Minister di Enseñansa, Hubentud, Innovacion y Deporte, mr. Gerlien Croes, a enfatisa cu e medida aki ta refleha e compromiso di gobierno pa sigura cu e desaroyo economico di e pais ta beneficia tur ciudadano. Minister di Asuntonan Economico y Finansa, mr. Geoffrey Wever, a añadi cu esaki ta un muestra di un reparticion mas husto di e fondonan publico.
Minister di Salud Publico, Asunto Social y Cuido di Adulto Mayor y Adiccion, drs. Mervin Wyatt-Ras, a indica cu esaki ta solamente un prome paso den yuda nos grandinan, cu a perde hopi poder di compra. Minister di Turismo, Transporte y Labor, mr. Wendrick Cicilia, a conclui bisando cu e aumento aki ta un refleho di e balornan di prosperidad comparti y solidaridad p’e gruponan vulnerabel, cual t’e base di e gobernacion actual.
Pa mas detaye lesa TREMPAN.
