GOBIERNO DI ARUBA PREOCUPA CU MEDIDA DI VENEZUELA

Gobierno di Aruba ta hopi preocupa cu e medida di Presidente Maduro pa cera frontera pa trafico di y pa entre Aruba y Curacao pa 72 ora. Desde diabierna anochi Gobierno di Aruba ta den evaluacion constante cu Buitenlandse Zaken di Hulanda, y tambe cu Prome Minister di Curacao, Ruggenaath pa asina ta riba un liña. Atravez di e canalnan oficial di Reino gobierno di Aruba ta den contacto cu autoridadnan di Venezuela pa mira con por soluciona e situacion.

Gobierno di Aruba ta dirigiendo tur atencion caba na atende cu e problema di contrabando, cu ta e motibo di e decision di presidente Maduro. Reino y Aruba ta reconoce e preocupacionnan di Venezuela riba contrabando. Pa cua motibo tambe kier tene un linea habri di comunicacion.

Prome Minister ta enfatico riba esaki, tur ilegalidadnan cu ta tumando luga mester wordo combati. Y e intencion di Reino y Aruba ta pa haci esaki den cooperacion cu Venezuela.

Entre Venezuela y Aruba tin lasonan hopi estrecho economicamente, familiar y cultural y pa e motibonan aki e medida aki pa sera e frontera cu Venezuela ta afecta nos hopi.

E medida di Presidente Maduro ta pa cera e frontera di buelonan pa Aruba y Corsow pa 72 ora. Gobierno di Aruba y Reino lo sigui den dialogo cu Venezuela pa yega na un solucion di e situacion aki mas pronto posibel.