“Nos mester warda kico Gobierno di Hulanda ta bisa riba e amienda cu Parlamento di Aruba a vota p’e durante adaptacion di ley di LAFT”, asina Prome Minister mr. Evelyn Wever-Croes a bisa awe durante su conferencia di prensa semanal. El a contesta preguntanan di prensa, relaciona cu e ley cu Parlamento a pasa siman pasa, den cual ta mina e autoridad cu Gobierno di Hulanda tabatin den consehonan cu CAFT duna riba maneho financiero di Gobierno. Pero, ta parce awor cu e ley di Parlamento lo no tin ningun balor, pasobra Gobierno di Aruba tin pensa di respeta e protocol firma cu Hulanda.
E prome mandatario di nos pais a sigura cu si Gobierno di Aruba no cumpli cu e protocol firma, den cual di cierto forma caba, ta regla e funcionamento di CAFT na Aruba, cu no cumplimento lo por desemboca facilmente den un Koninklijk Besluit di Gobierno di Reino riba Aruba. “Esey semper Hulanda por haci y nan a haci’e caba den pasado bou Gobierno di Gabinete Eman”, asina Premier Wever-Croes a enfatisa. El a corda tur hende cu e tempo aya Eman a haya un KB sin cu tabatin ley ni protocol firma cu Hulanda mes, pues cu Gobierno di Reino semper lo por cana e caminda ey na momento cu nan no ta satisfecho cu maneho di Gobierno di Aruba.
Cu si nan lo haci’e den e caso aki awor, no por bisa. “E ora lo mi ta speculando”, segun Wever-Croes. El a sigura cu Gobierno di Aruba y Gobierno di Hulanda ta di acuerdo cu otro y a firma un protocol y awor e amienda cu Parlamento a pasa recientemente, lo mester puntra Parlamento dicon a pas’e asina toch si nan sa cu Aruba a mara su mes den un protocol caba cu Hulanda.