Gobierno di Aruba a celebra Dia Mundial di Autismo. A haci esey door di cende luz blauw, cu ta representa tur esunnan cu tin autismo. Keda trece kico ta autismo ta algo importante cu mester haci.
Byron Lesire, embahador di Fundacion Autismo Aruba, a conta cu e dia tabata pa refleha riba e importancia di aceptacion, empatia, conscientisacion y tambe educacion na e personanan autista. E ta kere cu den comunidad mester tin mas empatia como enseñansa, incluso conscientisacion y aceptacion di e hendenan special. Mester boga mas duro pa yega na un inclusion sistematico aki na Aruba.
Roelien Hofman, vice-presidente di Fundacion Autismo Aruba, a conta cu diaranson tabata dia Internacional di Conscientisacion di Autismo. A celebra tur mucha y adulto cu ta autista. E tabata sumamente gradici p’e invitacion cu nan a haya, pasobra nan tabatin e pensamento si esaki ta bay sigui manera tabata haci.
E parti importante ta keda conscientisacion. Hofman a indica cu ainda tin hopi hende cu no sa kico ta significa pa tin autimso. Tin mayor tin miedo pa laga diagonistica nan yiu, pasobra nan ta kere cu e mucha lo haya un stempel. Pero e no ta asina y segun Hofman, ta pa tur hende sa y duna ayuda p’asina e bida ta mas husto pa tur hende.
drs. Mervin Wyatt-Ras, Minister di Salud Publico, Asunto Social y Cuido di Adulto Mayor y Adiccion, a conta di mira cuanto hende a presenta n’e presentacion di Dia Mundial di Autismo. El a indica cu na hopi pais ta cende e luz blauw y Aruba tambe a tuma esey over, unda e poblacion tambe ta para tras di esaki.
Pa mas lesa TREMPAN.COM.
