Durante e conferencia di prensa di algun rato pasa, Minister Presidente Evelyn Wever-Croes a duna e prome reaccion den nomber di Gobierno di Aruba riba e anuncio di aumento di tarifa di awa cu WEB a haci awemainta. “Gobierno ta desagradablemente sorprendi”, asina e mandatario a bisa, indicando cu ainda na comienso di e siman aki nan tabata sinta na mesa cu directiva di WEB pa negociacion riba e tema.
Dicho negociacion a cuminsa despues cu WEB a pidi pa bin cu aumento, pero gobierno di su banda a pidi pa mira cierto trabou wordo haci. Premier Wever-Croes a duna di compronde cu no tabatin ningun palabracion cu WEB pa awe haci un anuncio asina.
Mas aleu, Wever-Croes a afirma cu e aumento no ta conta cu e aprobacion di su gabinete y cu ta responsabilidad di su colega, Glenbert Croes, como titular di energia, pa atende cu e asunto aki. Locual e ta haciendo caba y cu asina cu tin un desaroyo, lo comunica esey. Tambe a descarta cu e anuncio di parti di WEB lo por ta relaciona cu aprobacion den parlamento di e Landsverordening Normering Topinkomens.
