Gobierno cu posicion antidemocratico contra Parlamento

116

E decision di Gobierno pa no ehecuta e ley cu Parlamento a aproba di LAft, incluyendo e amienda di Parlamentario Rocco Tjon ta antidemocratico. “E no ta algo cu sa sosode hopi, pero tanto Aruba como Hulanda hopi biaha sa comete e mesun eror aki, den cual den forma delibera ta torno na e democracia Parlamentario di nos pais”, asina un experto riba leynan di structura estatal a duna nos di conoce. Gobierno di Aruba no por djis hala e ley un banda, pasobra por sosode, aunke kisas na Aruba no, cu Parlamento ta bira pasa un mocion di desconfiansa contra e Ministernan y manda nan cas!

Den e caso specifico aki, Gobierno a manda e ley di LAft pa Parlamento ratifica. Nan mester a haci esey di aña pasa caba pero a present’e laat te na luna di juni 2019, pues como 6 luna despues. Durante tratamento di e ley, e fraccion di MEP, encabesa pa Rocco Tjon, a presenta un amienda den cual ta kita e poder di Conseho di Minister di Reino y ta pas’e pa Parlamento di Aruba. Aunke Gobierno a haci comosifuera e no tabata sa di e buelta aki, eyden e mesun Minister Presidente Wever-Croes a duna “stem advies” pa sostene e amienda di su colega di partido Tjon, cu de facto ta totalmente contra e maneho di Hulanda.

Separa di esey, e amienda ta bay totalmente contra di e acuerdo cu Ministernan Wever y Maduro a firma den un protocol na november 2018 cu Gobierno di Hulanda. Ey a acorda entre otro cu lo prolonga e ley di LAft, manera cu e tabata di aña 2015, pa tres aña mas. No solamente Gobierno no a cumpli, sino a kita tur poder di Hulanda tambe den e tarea di supervision financiero di nos finansa publico. Parlamento di Aruba ta haya cu nan mes mester supervisa Gobierno y no un instancia di Hulanda.Ta sinti cu esey ta atacha nos autonomia.

Minister Presidente ta entre Parlamento y Hulanda

Ta obvio cu ningun hende kier tin e trabou di Minister Presidente Wever den e dianan aki, pasobra na ambos banda e ta den problema. Si e scoge pa cumpli cu su protocol firma cu Hulanda, e lo ta den problema cu su Parlamentarionan. Si e scoge pa cumpli cu su coleganan di partido, e lo ta den problema cu Hulanda. Pues, con cu e bira, el a hinca su curpa den un problema constitucional cu ta dificil pa sali for di dje y cu hasta por cost’e existencia di e Gabinete.

Rocco Tjon: Gobierno mester argumenta awo!

E miembro di Parlamento di MEP, Rocco Tjon, a contesta riba nos preguntanan cu “Ta un ley tin. No tin un ley cu amienda of un ley sin amienda. Ta un ley tin. Si Gobierno scoge pa no “bekrachtig” e ley, segun constitucion, nan mester argumenta nan decision. Y  base di esey Parlamento mester dicidi si nan ta haya e argumentonan legitimo”.

Tjon y Thijsen lo vota pa pasa ley di LAft toch?

E reto grandi awor ta, cu Hulanda probablemente lo exigi di Gobierno, pa pasa e ley di LAft ainda, manera cu e tabata. Den un caso asina, e pregunta di oro ta cu si Rocco Tjon y Ady Thijsen, cu ta e dos Parlamentarionan mas critico riba e tema aki, lo sostene e ley toch. Den un caso cu nan no vota na fabor, Gobierno lo tin solamente 10 voto y e ley lo no pasa si acaso oposicion no coopera. Sin duda e lo hinca e Gabinete den un problema mas grandi ainda cu Hulanda, di locual nan tin awor aki caba.

Hulanda no ta santo di debocion tampoco

Ta bon pa señala cu Gobierno di Hulanda tampoco no ta ningun santo di debocion den nan actuacionnan. For di aña 2014 cu a cuminsa cu e asunto di ley di LAft pa supervision financiero, nan a trapa riba e poder di Parlamento di Aruba. Na november 2018 ora a core firma un protocol cu Gobierno di Aruba, tampoco nan no a puntra ni scucha “gevoelens” di Parlamento di Aruba. Den un caso cu Hulanda firma un tratado, nan mester pasa Parlamento di Hulanda pa ratifica. Aki nan ta djis firma un protocol sin pasa Parlamento.

Crisis constitucional na caminda?

Expertonan ta teme cu e asunto aki lo por causa un otro crisis constitucional entre Oranjestad y Den Haag. “Nada nobo”, un experto a sigura na nos. E ultimo 30 añanan ta varios di e crisisnan aki nos a yega di pasa dor di dje, specialmente pa e forma con Hulanda ta atende cu e islanan akibanda. Pero, esun aki ta bin na un mal momento, net ora cu Gobierno di Aruba ta den necesidad pa haya sosten di Hulanda pa tur e medidanan cu mester tuma pa regla e situacion financiero y cumpli cu e normanan di CAft. Ta bon pa corda tur hende tambe cu organisacionnan di control manera Standard & Poors y IMF a opina riba nos situacion financiero basa riba e hecho cu nos ta supervision di Hulanda. Asina cu nan “kita man for di nos” probablemente tur e pronosticonan positivo ta cambia, cu tur consecuencia pa e imagen di Aruba riba mercado financiero internacional.