Aruba ta riba un bon caminda pa cuminsa sali for di e di dos ola di COVID, segun prome minister Evelyn Wever-Croes durante e rueda di prensa di gobierno dialuna anochi.
E ta enfatisa cu por a mira desaroyonan positivo. E ta gradici un y tur pa cumpli. Tambe ta gradici frontliners, vooral den sector di cuido y orden publico. Na comienso di september tabata tin 1200 caso activo. Medio september el a piek pa 1600. Despues a cera september cu rond di 600.
E mandatario a sigui splica cu a cuminsa october cu 640 caso activo y awo ta bao di 200 caso. Mester haci awo mas esfuerso nos dilanti pa baha e cantidad aki.
Lamentablemente e cantidad di persona cu tabata tin COVID y a muri a yega 36 di cual 17 na september y 9 den e luna aki.
E cantidad di persona cu ta den hospital pa dia ta varia. Dia 1 di september tabata tin 40 hende cu COVID y 10 den Intensive Care. Awe tin 12 hende den hospital y 1 den Intensive Care.
Ta pidi tur ciudadano pa continua cu e disciplina cu a bin ta demostra, mantene e cantidadnan abao. Awo hospital ta funcionando normal, aunke tin un lista largo di espera. A logra esaki pasobra a bin cu medidanan mas estricto na comienso den e di dos ola, manera Toque de Queda, cual awo a keda elimina. Y na su luga ta e gebiedsverbod, cual ta prohibi personanan pa ta den area di beach y areanan publico for di 12’or pa 5’or pa local y turista.
Tambe a pone uzo obligatorio di tapaboca den edificionan. Tur esaki lo no por tabata posibel sin disciplina y cooperacion di comunidad. Ainda tin algun no sa con facil e sitacion por sali for di man bek pero mayoria di nan si sa esey. Ta pesey ta pidi pa keda un tempo mas pa demostra e disciplna aki. Ta pidi pa duna un poco mas di nos mes pa baha e 164 casonan te na 0.
Ta importante pa nos baha e cantidad di casonan activo pa asina por reactiva nos economia, e ora ta kita Aruba for di lista di alerta cu nos ta riba dje. Esey lo ta un bon noticia si no considera Aruba mas como un area di riesgo. Asina nos por ricibi mas turista y crea mas cupo di empleo. Por mira cu e salario cu a bay atras por recupera. Ta pidi pa mantene na e reglanan y ban sigui cuida.
