Un biaha mas Gobierno ta invita sindicatonan di sector publico pa sinta na mesa pa dialoga riba e carta di siman pasa encuanto indexering.
E formula aki ta mustra cu parce cu Gobierno ta trata di gana tempo, despues cu den e reunion grandi di siman pasa na Wilhelmina Park e miembronan di e diferente sindicatonan a bisa cu nan no kier sinta na mesa y kier yega na un acuerdo rapido pasobra nan a warda mucho tempo caba.
E carta ta dirigi na e sindicatonan SADA, SPA, SEPPA, TOPA y SIMAR y e tema di e reunion ta indexering.
Den contesta riba e carta di dia 21 di november ultimo, nan ta bisa cu e proposicion cu Gobierno a duna ta basa riba e responsabilidad pa e bienestar general, tumando na cuenta e situacion financiero precario y sin precedencia hereda di pais Aruba. Pues Gobierno ta subaraya cu e tema di indexering indudablemente ta un responsabilidad comparti. No obstante e situacion financiero precario menciona, Gobierno ta convenci cu semper mester tin espacio pa sigui negocia.
Y pa e motibo ariba menciona ta invita e sindicatonan pa un reunion dia 2 di december.
Sindicatonan di sector gubernamental for di april ultimo a bin ta trata di haya Gobierno na mesa pa papia riba indexering di 2018 cu ta calcula na 3.6%. Sinembargo despues di basta menasa di accion, finalmente Gobierno a bin haci un proposicion di un aumento di un poco mas cu 5 florin den e salario, como punto di salida. Algo cu e sindicatonan a sinti como un falta di respet y no ta aceptabel pa nan. E prome proposicion di Gobierno tabata compensacionnan pero cuminsando te na 2025, cual tabata un oferta pio pa e sindicatonan, cu ta exigi un aumento den e salario pa motibo cu a perhudica nan hopi caba cu e composicionnan for di salario pa cubri indexering.
Proposicion
A ricibi di parti di gobierno un proposicion. E proposicion por bisa cu ta keda mesun cos, solamente un biramento di palabra y e proposicion cu nan tabata tin for di dia 25 di october caba. A bin tende cu proposicion real mes ta un 0.515% den salario, cu ta nifica cu e trahado di gobierno apenas ta haya 5 florin y 76 cen.
Con ta mir’e asina pa motibo cu Gobierno ta propone pa e aumento di e tres primanan cu lo mester a tuma luga na januari, augustus y november, pa wanta esaki, cu ta nifica 315 florin. E 315 florin ey nan ta dispuesto pa hink’e den salario, plus 75 florin. Ora cu wak’e ta 390 florin, conta den 13 luna. Aki por mira cu ta apenas un 30 florin den salario na e momentonan aki.
Pero e realidad ta cu e 315 florin aki, e trahado di gobierno tin’e caba den su tres primanan y ta e 75 florin gobierno kier compensa pa e aumento di costo di bida di 2018. Ora cu mir’e den 13 luna bo ta sali e ora cu ta 5 florin y 76 cen. Nan kier mantene nan posicion di 0.6% y 0.4% cu nan a propone caba dia 25 di october. SEPPA a indica caba na gobierno cu e proposicion aki a wordo rechasa pa e miembronan di SEPPA, Secretaria General di SEPPA a bisa den e ultimo reunion.
