Gobierno ainda buscando forma pa Venezolanonan bolbe nan pais

E situacion reinante na Aruba, cu frontera cera, a haci cu Gobierno y su departamentonan mester a adapta maneho den forma temporal. Den un conferencia di prensa Minister di Husticia Andin Bikker a papia di e parti di e turistanan cu a keda pega na Aruba y e ilegalnan cu kier bandona e isla.

Extension di estadia normalmente ta wordo haci cerca IASA. Pero door di e situacion reinante tin un grupo di bishitante cu a keda pega. Ta trata di e grupo cu normalmente ta bin disfruta di e isla y ta keda na hotel. Nan ta haci uzo di e maximo dia, cu extensionnan, cu nan por keda e isla. Y tin e grupo cu a bin di bishita cerca famia, riba invitacion, y ta kedando na casnan di famia.

Gobierno ainda buscando forma pa Venezolanonan bolbe nan pais

Gobierno ainda buscando forma pa Venezolanonan bolbe nan pais. Click link pa mas https://24ora.news/2QYq5kh

Posted by 24ora on Monday, March 30, 2020

Den cuadro di e crisis di COVID-19, tin un grupo cu a keda pega door di vuelonan regular y departamentonan di Gobierno cera. E turistanan cu a keda pega na Aruba recientemente, desde 16 di maart, por keda te dia 17 di april sin pasa den e proceso aki. Pues si frontera ta habri, pa dia 17 di april nan mester bandona Aruba. E mandatario a menciona cu Departamento di Relacionnan Exterior ta trahando pa yega na un solucion pa esnan cu ta pega na ambos banda. Esta esnan pega na Aruba pero tambe tin Arubianonan pega na Venezuela. E decreto di e maneho ariba menciona no ta pa personanan cu a bini aki como turista y a keda atras y tampoco pa esnan cu a pidi asilo. Solamente esnan cu tabata den nan tempo legal di estadia ainda.

Gobierno a haci un analisis di 2018 bin ariba di esnan cu a haci peticion di asilo. E hendenan aki a bini Aruba pasobra nan conoce hende of tin un familiar aki y ta kedando na un cas. Tambe a constata cu 90% di esnan cu a haci peticion pa asilo ta pa motibonan economico. Pues no ta personanan cu ta persigui politicamente. E no ta e motibo cu ta menciona den e Ley di Asilo pa cual motibo ta nenga nan peticion tambe. Pues bou di ningun tratado e peticion di asilo por keda otorga. Mirando e resultado ariba menciona, dos siman pasa caba Gobierno a cuminsa anuncia cu si e unico motibonan pakico e hendenan aki no por bolbe Venezuela ta pasobra no tin e fondonan necesario of no tin vuelo disponibel, ta percura pa busca e forma pa nan por bandona e pais, bou di e condicion cu pa un tempo nan no por bolbe Aruba mas. Tambe ta permiti pa retracta y hala nan peticion di asilo aden.

Por bisa cu Gobierno ta invitando e hendenan aki pa bay nan pais. Prome cu yegada di COVID-19 mes e perspectivanan no tabata asina alentador. Y e perspectiva a bira pio pasobra ciudadanonan local mes ta enfrentando retonan y esaki a pone cu hopi a cuminsa pensa pa bolbe nan pais, unda nan tin nan famianan cerca.