Gobierno a huur Ward’i Polis Oranjestad for di “spirito”

10094

Durante e reunion publico den Parlamento ayera, durante e discurso largo den prome rond di Minister Marisol Lopez-Tromp, el a presenta algun posibel motibo dicon partido POR ta rabia cu ne. Un di e puntonan ta huurmento di Brown Building como Warda di Polis nobo pa Oranjestad. Ta resulta cu a forsa huur e edificio, pero a huur di un spirito, pues di un posibel cumprado, pero cu te awe no a cumpra y como tal no ta doño di e propiedad!

Esaki ta e scenarionan tipico di un comerciante sabi cu ta interesa pa cumpra un edificio y prome cu cumpr’e, ya el a huur e caba cu Gobierno. Tipo di construccionnan manera a sosode cu Goldmine Properties na Tanki Fip e tempo aya. Awor parce cu algun consehero y coordinadornan yega na partido POR, cu intermediacion di Alejandro Muyale, a bay acerca famia Brown, herederonan di defunto abogado Roy Brown cu a fayece tres aña pasa, purbando pa cumpra e edificio.

E grupo, cu ta hopi yega na e partido y su Ministernan, tabata sa bon cu Polis ta interesa pa huur un edificio nobo pa sirbi como nan Warda principal pa Oranjestad. Den urgencia a core negocia y na augustus 2019 a forma un Sale and Purchase Agreement entre Muyale y Helen Brown, señora di defunto abogado Roy Brown. Den e SAP a stipula cu den algun siman di tempo, e conocido comerciante di Tiara Air, lo mester presenta cu e placa pa por traspasa e edificio.

Simannan a pasa y consecuentemente lunanan a pasa y nada di e placa. Polis ta pone presion pa por drenta nan edificio nobo pa haci trabounan di construccion pa adapta e infrastructura pa un Ward’i Polis pero nada. Hasta Minister Bikker a intermedia personalmente pa purba presiona pa un acuerdo entre Brown y Muyale pero nada di e placa.

Claro cu e presion a bay halto pasobra entretanto, eroneamente, Gobierno a firma un acuerdo di huur cu Alejandro Muyale. A firma e acuerdo contra conseho di DIP y DOW. Ambos a conseha Gobierno pa NO firma pasobra e condicionnan no ta corecto y Muyale no ta doño di e edificio. Pa firma un contract mester ta cu sea e doño of un apoderado. A pidi Muyale pa haya un “volmacht” for di Brown pa por actua den su nomber pero nunca el a logra presenta dicho documento cu e apoderacion.

Pa famia Brown e ta un simpel benta; sea ta bin cu e placa pa cumpra e edificio of ta laga para. Tin varios negoshi ta huur espacio eyden pa hopi aña caba, manera entre otro Fedex. No ta nan a acerca Gobierno, sino ta conseheronan di Gobierno a acerca nan cu peticion pa cumpra e edificio, a negocia un prijs y despues di forma e SAP, nunca mas e comerciante a logra haya financiamento pa su compra, ni cu e acuerdo di huur firma pa Minister Andin Bikker.

Probablemente banco tambe a realisa cu dicho contract no ta legal pasobra esun cu por huur edificio di Gobierno ta DIP y e Minister di Infrastructura. Ta cu e realidad ey mes te awe Departamento di Finansa nunca a paga huur di e edificio pasobra no tin firma ni di DIP y ni di Minister di Infrastructura bou di dje.

Hasta tabatin intencion pa uza fondo cu a bin di Gobierno di Hulanda pa atende e problematica di Venezolanonan ilegal na Aruba, pa traha cel y amplia e edificio. Hulanda e tempo ey a nota e intencionnan dudoso aki y a para e proyecto, argumentando cu Hulanda no ta pone fondo disponibel pa hinca den edificionan cu no ta di Gobierno. Asina henter e proyecto pa traha cellencomplex na Brown Building a para, tambe pasobra e supuesto cumpradonan a resulta di ta saco bashi y cu ningun banco kier fia nan placa tampoco.

Ultimamente a informa cu AIB-Bank lo ta interesa pa cumpra e edificio. Pero ey tambe e proceso a medio pega pasobra supuestamente lo kier a crea un construccion legal cu atrobe Gobierno mester paga huur na e cumprado spirito den forma di un intermediario. Esaki mientras normanan di Gobierno di Aruba ta bisa cu no ta huur ningun edificio di intermediario, sino solamente di e doño natural di e propiedad. Pues si ta AIB-Bank ta doño, lo huur for di nan. Esey atrobe no a cay den bon tera cerca e grupo pasobra atrobe nan lo a cay “for di e deal”.

Te awe Polisnan ta sin un Warda di Polis adecua na Oranjestad y ta trahando un pida for di Wilhelminastraat mientras cu recherchenan ta comparti un otro edificio na Wayaca di Den Oduber unda antes KMPG tabata situa y cu RST ta huur pa algun aña caba sin problema.