Jurette Croes, di e seccion di comunicacion y prevencion na Departamento di Salud Publico di Aruba (DVG) un rato pasa a confirma cu a confirma e di 5 pashent contagia cu Coronavirus riba nos isla. Mescos cu e 4 prome casonan, e persona aki, cataloga como un residente, a yega Aruba for di un biahe na un pais cu tin presencia di e virus.
Mas informacion Gobierno no por a suministra awe mainta, ni tampoco si ta un hende muhe, hende homber y ni su edad. Como cu ta menciona residente, ta laga espacio pa diferente interpretacion, sea ta un Arubiano of un stranhero pero biba y/of trahando riba nos isla.
Jurette Croes di DVG a confirma cu e pashent ta na cas y ta bou cuarentena. Na e momento aki ta haciendo “contact tracing” entre tur esunnan cu tabatin contacto directo of den cercania di e pashent. Awe nochi 8:00pm lo tin conferencia di prensa atrobe, pero cu Minister Presidente mr. Evelyn Wever mes como orado y cu oportunidad pa contesta varios preguntanan pendiente.
