Gobierno a briya cu nan ausencia pa despedi di funcionario Mericano

Ni Minister Presidente mr. Evelyn Wever-Croes, ni Minister di Husticia mr. Andin Bikker a haci acto di presencia awe na ocasion di despedida di James Grimes como e Hefe maximo di United States Customs Border Patrol (CBP) awe na Lucy’s dilanti Renaissance Resort. Un empleada di Departamento di Relacionnan Exterior a representa Gobierno di Aruba pa despedi di e maximo autoridad Mericano riba Aruba. Ex Prome Minister mr. Mike Eman tabata invita y a hiba palabra y a “representa” Gobierno di Aruba.

James Grimes a yega Aruba den tempo di Gabinete Mike Eman y a traha e ultimo añanan masha di cerca cu Gobierno. Hecho ta cu e tin e funcion di mas halto na Aruba den representacion di Gobierno di Merca y como tal e ta representa e Consul di Merca na Corsou pa trabounan na Aruba. Algun tempo atras el a bandona Aruba pa bay staciona na un otro aeropuerto.

Durante e evento di awe, Departamento di Relacionnan Exterior di Gobierno a gradici’e pa su trabounan y pa su cooperacion di semper. Gerencia di Aruba Airport Authority tambe a yam’e danki pa tabata un bon partner pa aeropuerto.

James a bisa di a keda masha contento cu tur cu a atende e evento pa despedi di dje. E ta regresa Merca cu bunita recuerdonan di Aruba y e ta contento cu den su tempo, el a logra baha e tempo cu pasaheronan ta warda pa wordo procesa na US CBP. Na Aruba e proceso ey di control ta bay hopi mas lihe compara cu na aeropuertonan den Merca mes. Ainda e ta kere cu por traha un poco mas eficiente pa baha e tempo mas ainda y procesa pasaheronan mas lihe, aunke cu ta controla paspoort y tur otro informacion di e pasahero.

Comments

comments