Gobernador ta combersa cu organisacion di dunado di trabou y di trahado di Aruba

478

Gobernador di Aruba, S.E. Alfonso Boekhoudt, a realisa bishita di trabou na Federacion di Trahadornan di Aruba (FTA), Aruba Hotel and Tourism Association (AHATA) y Aruba Trade and Industry Association (ATIA). Durante e bishitanan Gobernador a combersa cu e miembronan di directiva di e organisacionnan aki. Central durante e combersacionnan ta e impacto cu Coronavirus (COVID-19) tin riba e miembronan di e organisacionnan aki.

Pa medio di e combersacionnan telefonico y, si ta posibel, bishitanan di trabou, Gobernador Boekhoudt ta informa su mes tocante e consecuencianan di e brote di coronavirus y ta expresa su apoyo y aprecio pa e esfuerso di hopi persona den e lucha contra e pandemia. Ta tuma medida, den consulta cu e organisacionnan involvi, pa asina e bishitanan di trabou por tuma luga na un manera sigur.