Dialuna mainta riba Dia Internacional di Dunado di Sanger, Stichting Bloedbank Aruba tabatin e honor di yama bonbini na Gobernador di Aruba, su Excelencia Alfonso Boekhoudt. Un bishita na unda e meta tabata pa Gobernador Boekhoudt haya amplio bista di e trabou di Bloedbank, lansa oficialmente e website nobo https://www.bloedbankaruba.aw/ y alabes Su Excelencia mes a registra pa por bira dunado di sanger y asina forma parti di e team di heroe.
Mainta trempan Gobernador Boekhoudt a ser ricibi pa delegacion di Hospital di Aruba, esta Jacco Vroegop y Gregory Croeze di Hunta di Directiva hunto cu Fabian Werleman di Bloedbank. Eynan Werleman a duna Gobernador Boekhoudt un amplio recorido na unda extensamente a splica cada paso pa bira dunado y alabes con e proceso ta despues cu e dunado duna sanger pa asina salvaguardia siguridad di e sanger cu e pashent ta ricibi.
Siguientemente a pasa pa e parti oficial na unda Werleman di Bloedbank a yama bonbini y a felicita tur dunado riba nan dia y gradici nan pa semper ta cla pa duna sanger no ta importa ni ora ni dia. Siguientemente a hiba palabra Vroegop di Hunta di Directiva cu a gradici e team di Bloedbank cu aunke den circunstancianan dificil a haci un tremendo trabou y sigui salvaguardia e siguridad di sanger diariamente durante un pandemia. Alabes Vroegop a enfatisa cu tin scarsedad di mas of menos 1500 dunado y pues ta haci un yamada pa registra.
Por ultimo Gobernador Boekhoudt a hiba palabra na unda sigur a enfatisa e importancia di e trabou di Bloedbank y tambe y su motibo y deseo pa bira dunado di sanger. Siguientemente tur presente a conta di 5 pa 1 y hunto a lansa e website nobo di bloedbank. Gobernador Boekhoudt a pasa na e laptop y como prome persona a registra digitalmente pa bira dunado. Sigui pa algun otro colega cu a aplica di biaha via https://www.bloedbankaruba.aw/.
Un mainta ameno na unda a brinda reconocemento na e team di Bloedbank cu ta traha incansablemente pa brinda sanger safe y asina salba bida di tur cu tin mester di e producto di sanger. Hospital hunto cu Bloedbank ta felicita y gradici tur dunado di sanger pa nan esfuerso y cooperacion. Por ultimo, ta desea di gradici Gobernador Boekhoudt pa su bishita y su registracion pa bira dunado y asina tambe scapa bida!
