Gobernador di Aruba: Awor ta tempo pa mustra solidaridad 

“Nunca antes den tempo di paz, nos libertad di move, di biba un bida normal of haci comercio a wordo limita manera e ultimo simannan”, asina Gobernador di Aruba, S.E. drs. Alfonso Boekhoudt a menciona na inicio di su discurso nacional di awe diadomingo 7:00pm.

E instruccionnan di Gobierno basa riba conseho di expertonan local, di nos islanan ruman, di Reino y di instancianan internacional, tin como meta pa evita cu Coronavirus ta expande su mes den nos comunidad y bira un peliger inminente pa salubridad publico.

E no mag congestiona nos sistema medico y di cuido. No ta wega tin. E medidanan di precaucion, higiena, distanciamento social, toque de queda, como tambe shelter in place, ta sumamente necesario awor aki. Ta compronde cu esaki ta haci un impacto grandi riba nos forma di biba, segun Gobernador.


Pero e medidanan aki ta pa evita pa nos perde e bataya pa Coronavirus sigui expande su mes. Por mira con na paisnan Europeo nan a hasta yega na e punto unda cu mester a scoge entre bida of morto di un ser humano, pa scapa otro, algo cu normalmente ta den man di Dios.

Pesey ta deber di nos tur como ciudadano pa tuma e responsabilidad aki cu ta pisa riba nos na serio. Cada un di nos riba e baranca tan stima aki. No mester neglisha e instruccionnan cu nos ta ricibi. Cuidando nos mes nos ta cuida otronan cu hasta por salba nan bida door di no laga nan wordo contagia.

Dia 18 di Maart tabata e dia cu nos mester a canta cu bos halto cu grandesa di bo pueblo ta su gran cordialidad. Awo nos mester demostra esey cu hecho. No ta tempo pa difundi noticia di calumnia, ni pa purba di saca probecho di e desesperacion cu por existi, ni tampoco pa crea panico pa metanan dudoso. 

Un proverbio ta bisa, un bobo no tin delicia den comprendemento, ma solamente den expresion di su mesun opinion. Crisis no ta sinonimo na sembra discordia, ni tampoco desordo, ni crea desunion.

Como isla chikito y dependiente di economianan mundial y nan desaroyo, e pandemia aki a afecta no solamente nos bida diario, pero tambe e pilar principal di nos economia, cu ta nos turismo. Nos a conoce crisisnan den pasado manera ciere di Lago of e crisis financiero pero nos situacion actual ta mas grave. Pa hopi famia y comerciante, e impacto aki ta sin precedente.

Pero tambe ta dificil pa calcula su consecuencianan riba termino largo. Pero nos no por cay pa e trampa di laga e crisis aki pone ta enfoke riba deseonan egoista. Nos no por habri porta pa e sentimentonan negativo cu no ta tene cuenta cu bienestar general.

Nos tin cu corda riba nos grandinan y no lubida nos muchanan. Resa pa esnan den e prome liña di defensa y esnan cu ta traha den supermercado, botica y otro luganan di servicio esencial.

Nan tambe ta enfrenta miedo y incertidumbre. Y ta pesey laga nos mustra nan nos compromiso fraterno. Laga nos tene cuenta cu nan y mustra nan respet. Nos por a tuma nota con comercio a cambia nan manera di haci negoshi, pa sigui brinda servicio na nan clientenan. Pero nos ta wak diferente di nan tambe ta busca e forma pa yuda esnan cu tin mester.

Esaki ta algo di aplaudi, segun Gobernador. Tambe nos ta wak ehempel na esnan cu ta brinda ayudo na nan bisiña, esnan mas vulnerabel, esnan cu tin mester di cuido y otronan ta desplega liderasgo spiritual cu ta consola e alma cu tin mester, di guia y sosten di nos creador.

E rol di cada un di nan ta indispensabel na e momentonan aki pa mantene e fundeshi di nos sociedad. Ta un bon momento pa reflexiona riba con nos por ta un miho ciudadano y un miho persona.

E retonan nos dilanti lo ta grandi y nos mester hala faha mara pa un tempo mas largo cu lo a desea. Awor ta tempo pa mustra solidaridad. Personalmente gobernador a tuma e resolucion cu e ta solidario cu e pais den crisis.

Como Gobernador di Aruba pero tambe como ciudadano, ta pidi un y tur pa tambe ta solidario cu nos pais den crisis. Si nos tur haci esaki, un dia nos lo por mira bek atras riba famianan cu lasonan mas fuerte, un pueblo mas uni, un nacion unda su miembronan sa di pone nan diferencianan un banda pa un causa nacional.

Den e dianan di incertidumbre nos dilanti laga tur loke nos haci cu palabra of cu hecho, wordo haci door di amor pa nos pais. E ora lo no tin nada pa kibr’e.