Geneviève Lieuw, miembro di College voor de Rechten van de Mens desde 2017, riba diamars 17 di mei 2022 a reuni cu Gobernador di Aruba, Alfonso Boekhoud, via MS Teams. Durante di e combersacion aki a papia principalmente tocante e derechonan humano denter di Reino.
E college ta supervisa cumplimento cu e derechonan humano na Hulanda y tin e deber legal di stimula ratificacion, implementacion y cumplimento cu e tratadonan di derechonan humano. E aña aki un di e puntonan di lansa di e college ta: ‘Derechonan humano pa tur hende denter di Reino’.
Tur hende, sin importa unda nan ta biba den Reino, mester por tin y eherce e mesun derechonan humano. Aunke cu e college ta autorisa solamente na Hulanda y na Hulanda Caribense (Boneiro, Saba, Sint Eustatius), e college kier dirigi e mensahe aki tambe na beneficio di e otro paisnan den Reino mas efectivo posibel.
Den su cualidad como Organo di Reino, un di e tareanan di Gobernador ta pa monitor cumplimento cu acuerdonan, entre otro acuerdonan di derechonan humano, Den cuadro di esaki, Gobernador Boekhoudt durante di e audiencia virtual a intercambia idea cu señora Lieuw tocante e topico ariba menciona.
