Gobernador a acepta Gabinete Wever-Croes II

Formador mr. Evelyna Wever-Croes a emiti su informe final na Gobernador di Aruba, Su Excelencia Alfonso Boekhoudt. Formador a conclui cu e candidatonan pa nombra, ta capas pa e funcion di minister, respectivamente minister plenipotenciario, despues di evaluacion a base di e Decreto Nacional di 9  di september 2013.

Riba 27 di augustus Gobernador ya a ricibi e acuerdo di gobernacion firma pa MEP y RAIZ y e dia ey a informa tocante e reparticion di cartera. Formador cu esaki formalmente a acepta e  encargo di formacion.  

Formado a yama conferencia extraordinario pa anuncia ultimo desaroyo rond di formacion di Gabinete Wever-Croes II

Formado a yama conferencia extraordinario pa anuncia ultimo desaroyo rond di formacion di Gabinete Wever-Croes II

Posted by 24ora on Thursday, September 9, 2021

Formador a apunta e siguiente personanan pa nombramento como minister: 

  • Evelyna C. Wever-Croes; minister di Asunto General, Innovacion, Organisacion Gubernamental,  Infrastructura y Planificacion Teritorial, alabes minister-presidente 
  • Geoffrey B. Wever; minister di Asunto Economico, Comunicacion y Desaroyo Sostenibel 
  • Ursell M. Arends; minister di Integridad, Naturalesa, Transporte y Cuido di Grandinan
  • Xiomara J. Maduro; minister di Finansas y Cultura 
  • Rocco G. Tjon; minister di Husticia y Asuntonan Social 
  • Glenbert F. Croes; minister di Labor, Integracion y Energia 
  • Danguillaume P. Oduber; minister di Salud Publico y Turismo 
  • Jan H. “Endy” Croes; minister di Enseñansa y Deporte 

E conseho di minister nobo, di acuerdo cu e Reglanan di Procedemento di Conseho di Minister, lo dicidi  tocante e proposicion na Gobernador encuanto nombramento di e Minister Plenipotenciario na Hulanda.  

Despues cu ofrece e proyecto di e decreto nacional pa retiro di e ministernan actual y nombramento di e  ministernan nobo na Gobernador, Gobernador lo puntra presidente di Parlamento pa inform’e mas pronto posibel tocante e decision di Parlamento relaciona cu e retironan y e nombramentonan propone pa e  ministernan.

Si for di Parlamento no tin obhecion contra e proposito di Gobernador, por retira e ministernan actual y por nombra y huramenta e ministernan nobo. E fecha di e huramentacion ainda no ta conoci.