Kico cu un hende haci den bida, mester bay hunto cu un planificacion serio pa e tin logro. Hisa benta no ta duna fruta ni den cosnan simpel y hasta ora cu tin un plan, esaki no ta un garantia pa un logro. Den oposicion tin e espacio pa bisa hopi cos, pero ora cu bo ta un gobernante, bo mester pone e tempo di fabula tras di lomba. Ningun hende tin beneficio cu kasteelnan di aire. Den gobernacion di un pais, caminda miles of miyones di ciudadano ta depende di decisionnan corecto basa riba un vision y mision, no tin luga pa hunga “grabbelton”, hincando man den macutu y mira cu ki bo ta bin na laira. E ta un tipo di engaño. Di crea speransa falso, pero mas cu tur, di demostra cu bo no sa loke bo ta haci y cu bo ta kere cu ta un wega.
Ora cu e cabes di Gobierno ta anuncia cu su Gobierno lo baha prijs di awa y coriente, e ta zona manera muziek den horea, pero ora cu analisa e factornan cu ta e base pa conduci na esaki, e muziek di biaha ta bira falso. Den un compania manera WEB caminda ta haciendo constantemente inversionnan grandi den innovacion cu miras riba un suministro cu ta confiabel, pagabel y sostenibel mester pensa ki lo pasa si stop e inversionnan. Nos ta bisa esaki, ya cu prijs di crudo ta subiendo pa algun tempo caba y nos no conoce e pos magico pa suministra combustibel barata. Ta berdad cu WEB durante e añanan a crea hopi vet den su beneficionan laboral, pero hasta si por corta nan tur, hende lo keda babuca e poco influencia cu e lo representa riba e tarifa. Baha e edad di pensioen ta idem-ditto; tampoco e no por pasa e test financiero.
Den oposicion Dangui Oduber a critica Minister Otmar Oduber tur santo dia, pero awor cu e tin e Ministerio di Turismo, ki e ta haciendo cu ta diferente? Den ciclismo nan lo bisa cu e ta un chupa taira, ya cu e unico cos cu el a haci te ainda ta sconde den e draft di ATA, AHATA, etc sin ningun momento tuma rienda y duna guia. Ningun iniciativa, ningun plan! Afortunadamente pa nos pais, ya cu lo contrario lo ta un desaster.
Den salubridad tambe e tabata y ainda ta yen di critica, continuando cu su rol di oposicion, pero sin introduci ningun cambio fuera di core cu un Hefe cu kier e pone ordo. Cualkier Minister den pasado por a elimina e rekisito minimo pa practica medicina na Aruba, pero no tabatin un forma pa haci’e responsabel sin por garantisa e nivel di cuido medico cu danki Dios e paisnan den Reino Hulandes ta custumbra cune. E registracion BIG ta un proteccion pa nos ciudadano. No tin miho ehempel cu ex Minister Booshi Wever, kende a compronde y acepta esaki, siendo cu su propio yiu mester a pasa e estudio pa BIG y siendo Minister e no a opone.
Den deporte e Minister no a presenta ningun cambio structural ni un maneho. Basta critica e facilidadnan deportivo sin substancia ki e lo kier haci, pakico y cuanto e lo costa. E lo a mira e miyones cu ta core den Lotto di Aruba y a pensa cu e fondo aki ta ideal pa hunga Sinterklaas durante 365 dia pa aña. E no a busca forma pa acerca e instancianan pa presenta su maneho y mira con nan por ta util den su plan. Atrobe, el a continua cu e rol di oposicion y ta critica integrantenan cu no kier a habri e kluis pa e dicidi.
Minister Otmar Oduber a pensa cu e lo por bulldoze su ideanan manera e tabata haci den e gobernacion anterior, lubidando cu ey e tabatin e infrastructura di un Gobierno cu tabata traha segun un plan cu tabata delinea publicamente, caminda tur hende sa den ki direccion e pais tabata bayendo. E guia ey e no t’ey mas. Den e constelacion actual, e ta pega cada biaha, ya cu su ideanan no ta bendibel y sigur no despues cu su gabinete a strangula e poder di compra brutalmente. Serlimar ta e prueba cu nada por tuma luga sin un consulta amplio cu pueblo.
Minister Otmar Oduber a crea tanto conflicto cu cierto medionan di prensa cu awendia ta scrutina cada movecion cu e haci. El a perde e libertad cu e tabatin den pasado di pone hopi biaha cuchiu na garganta di esunnan cu tin otro opinion sin cu e practica aki a sali na conocemento publico. Esey a cambia. A lo menos e tin un plan y no djis un grabbelton. Pueblo sinembargo ta venena cu medida y kier mira solucionnan sin cu e mester paga pa cada cen.
