“Como persona cu ta studia ley y derecho di Aruba den contexto internacional, mi no por compronde nos legislador/parlamento den nan intento pa permiti locual ta yama ‘spearfishing’ na Aruba, den forma di gedoogbeleid”, asina mr. dr. Glenn Thodé, Rector di Universidad di Aruba, a publica awe nochi riba su pagina di Facebook.
“Pa compronde mi falta di comprension, kisas ta bon pa mira cu nos actual minister di husticia, mr. Andin Bikker, a purba convence Hoge Raad cu e prohibicion di e practica aki ta contra derecho di Aruba”, di acuerdo cu Glenn Thode.
Den su conclusion, e Abogado General Aben na Hoge Raad a conclui cu ta pa motibo di obligacionnan internacional tin e normanan aki na Aruba. Entre otro pa e motibo aki, e defensa di e punto treci dilanti pa mr. Bikker no tabatin exito na Corte Superior na 2015, apenas 5 aña pasa.
“Awe esaki lo no ta diferente. E argumentonan cu mi a lesa den media pakico kier permiti spearfishing na mi opinion no tin base realistico”, di acuerdo cu e experto di ley.
E documento fuente di Corte Superior (Hoge Raad) por lesa aki y ta referi na e puntonan 15 y 16. https://linkeddata.overheid.nl/front/portal/document-viewer?ext-id=ECLI:NL:PHR:2015:175
