Glembert Croes: Hunto nos por logra e cambio

Glenbert Croes, candidato riba lista di MEP, a presenta cu un caravana na Pius X School. El a splica cu nan a habri e dia masha bunita y a bishita tumba di su tata pa recorda su bida y recorda su compromiso, den e forma cu el a entrega su bida.
Croes a gradici tur esnan cu a yude den e campaña aki y a hiba e mensahe pa pueblo. Pueblo ta bay vota ta pasobra Gobierno a perde conexion cu e realidad, dolor, preocupacion, necesidad di nos pueblo. Apesar cu nan a traha obranan grandi manera Brug, Green Corridor, Watty Vos Boulevard. E no a traduci den beneficio, progreso pa nos pueblo. Na e momentonan aki cu pueblo ta pasando den asina hopi necesidad, nos mester un Gobierno cu e curason pa pueblo, di pueblo, cu ta goberna den pueblo, cu ta goberna den forma transparente, limpi di corupcion. Un Gobierno cu transparencia, dunabo bo derechonan pa tin’e. No ta importa na ki color bo ta bisti, loke ta importante ta cu bo ta haya loke bo tin mester. Si bo ta haya asfalt dilanti bo cas, luz dilanti bo cas, si bo ta haya un apoyo, un trabao, kico cu ta, bo ta hay’e pasobra bo tin derecho como ciudadano. Pesey mes MEP, liderisa pa Evelyn Wever-Croes, y e team di candidato cu el a trece hunto, ta 29 candidato cu a dicidi di asumi un responsabilidad grandi. Awe MEP ta sali e partido mas grandi na Aruba.
Segun Croes, e ta pronostica cu nan lo bay cu mayoria absoluto, 10+2. No ta tur ora hende ta gusta pa bisa esaki. AVP ta un monster. Pa por gana AVP mester di un milager. No solamente a resa pa un milager, sino a traha pa un milager. Pesey el a bisa cu confiansa, Aruba ta votando geel caba. Na tur e votadornan di AVP, POR, y e otro partidonan, Croes ta un candidato cu ta habri nan brasa pa despues di awe, uni como pueblo pasobra lo bay tin mester di un y tur, sin distincion pa nos salba nos pais. Pesey mes ta invita tur e votadornan di MEP, AVP, POR di tur e otro partidonan, brasa otro. No por ta un dia di confrontacion. Awe mester ta un dia di union mas cu nunca, pasobra hunto nos por salba Aruba, hunto por logra e cambio y sin miedo, cu Dios su poder.