GKMB ta uza e temporada seco pa controla y duna informacion

Den combersacion cu Luis Chong, hefe di GKMB, el a splica cu aworaki Aruba ta den temporada seco. Pero esaki tambe ta un temporada importante cu nan mester keda activo. Nan ta haci uzo di e temporada aki pa duna informacion na pueblo principalmente.
“Ora cu temporada di yobida drenta, e trabou ta bira hopi. Y tin menos tempo pa drenta pueblo, duna informacion y controla tambe e cas, tereno, negoshinan cu a lo largo por bira un problema,” segun director di GKMB, Luis Chong.

Loke ta haci constant, ta bishita cas. Esey ta keda un trabao constante cu ta wordo haci. Bishita casnan un pa un pa controla posibel criaderonan. Ya cu no tin awa, no ta haya hopi criadero aworaki. Pero si por informa e habitantenan cu cierto cosnan cu nan tin den nan cura of den vecindario di nan cas, por crea problema pa nan cas y pa e bario of e bisiñanan.

En berdad e tempo aki, GKMB no tin hopi molester di sangura di Dengue. Ta uzando e tempo mas tanto pa haci controlnan preventivo y duna informacion.

Comportacion di comunidad

Chong a splica cu personanan cu ta recoge awa di airco, no ta cuida esakinan bon. Tin hende ta haci nan esfuerso, poniendo sea un sefta riba e bari of hemchi di awa,   of ta haci’e limpi constantemente. Pero tin biaha ta haya personanan cu ta un tiki slap den esaki y por pasa mas cu un siman cu un hemchi di awa y den un siman ey caba, por haya un criadero di sangura.
Ta pidi tur persona cu ta haci uzo di awa di airco y den ora di temporada di secura, awa di yobida, pa por fabor cubri e hemchi of bari, of cualkier artefacto cu ta uza pa tuma e awa, cu un sefta of si no por, uza un tapa, den cual nan ta pasa un tubo y door di esaki ta acumula e awa. Esey no ta duna chens na e sangura pa drenta den e awa.

Materialnan di uzo

 

GKMB ta uza insecticidanan cu ta bon pa nos medio ambiente
https://24ora.tv/2XybPzZ

Posted by 24ora on Saturday, June 8, 2019

 

GKMB mes ta uzando un variedad di insecticida. Aña pasa a bay riba insecticidanan cu ta “milieuvriendelijk”. Ta uzando un insecticida por ehempel pa mata sangura cu ta basa puramente riba azetanan natural di mata. Ta haya un bon feedback di esaki cu e ta yuda hopi bon. Tambe ta uz’e pa preveni criadero, ora cu haya pochi di awa,  y cierto luganan cu tin awa para y cu tin larva den dje of ta premira cu por bay tin larva aden. Tin un otro tipo di insecticida cu ta uza cu ta basa riba biologia. E ta un bacteria, cu ta mata e larvanan. Pues e ta un forma di accion preventivo.

Apart di esey, loke ta e trabao di mas grandi ta e ayudo di comunidad mes, ta keda eliminacion di posibel criaderonan. Unda cu tin awa para of por tin acumulacion di awa, mester elimina esakinan of pone nan un caminda unda cu na no ta haya awa.
GKMB primordialmente su tarea ta pa preveni sangura di dengue. Den e temporada aki no tin hopi di esey. Ta keda cu controlnan di cas pa prevencion. Den cierto barionan ainda ta haya criadero y tin cierto barionan cu ta haya e molester di e sangura di Dengue, pero ta buscando unda e origen ta di e problemanan aki.
Na Santa Cruz tin un caso asina, caminda varios hende tin problema cu sangura di dengue. Pero ta buscando unda e origen di esaki y ta tumando tempo pa por pasa tur e casnan den e bario.

Tambe por menciona cu tin un problema grandi den e area di Pos Chikito y Savaneta. Pero esaki ta un problema di molester di sangura di mangel, esta sangura preto, cual tur mainta y atardi e barionan aki ta sinti e molester grandi di e sanguranan preto.
GKMB ta den full swing ta purba di preveni esaki. E ta un sangura cu ta crece den e awa salo cu tin den e mangelnan. E ta un problema grandi awor aki cu e mangelnan ta hopi cera. Mainta y atardi GKMB ta bezig den e mangelnan pa preveni pa e sanguranan aki por sigui broei y atardi ta purba tambe baha e cantidad di sangura door di pasa den e dos barionan aki pa baha e molester. Tin cu reitera cu e sanguranan aki no ta un peliger pa salud. Nan no ta transmiti Dengue ni Zika, ni Chikungunya. Pero si ta compronde cu e ta pica duro y ta un molester hopi grandi pa e barionan aki.