GKMB a topa cu varios criadero di sangura den caya grandi

Hopi persona den Caya Grandi a yama y duna keho na e departamento di Salubridad Publico cu nan tin molester di sangura. Pa e motibo aki empleadonan di Ministerio di Salubridad Publico hunto cu esunnan di Ministerio di Asunto General a bay personalmente den caya grandi pa papia cu e organisacion di comerciantenan cu tabata preocupa cu e situacion. Di parti di Ministerio di Salud Publico a haci tur posibel pa e seccion di GKMB di Departamento di Salud Publico por a asisti e comerciantenan den Caya Betico Croes.

 

Dianan 11 y 12 di juli 2017 GKMB a bishita Caya Grandi y diahuebs 13 di Juli tabata e di 3 dia di control. Pe motibo di e yamadanan di keho di sangura Directie Volksgezondheid a manda departamento di Gele Koorts en Muskieten Bestrijding (GKMB) un rapport di e situacion, kende na su turno a bay haci un control den Caya Grandi pa atende cu e kehonan. E team di GKMB ta na altura di loke ta pasando y lo ta sigui tuma accion den e dianan binidero. Durante e control e team di GKMB a controla e rails di tram, e rioolnan y e fonteinnan. Aki GKMB a bin topa cu hopi criadero den e rioolnan y di biaha a cuminsa basha veneno pa asina caba cu e criaderonan. E riool y fonteinnan tin awa aden y den e awa GKMB a mira larvanan di sangura y di biaha a cuminsa trata e problema, cual ta pone cu e combatimento contra larva tin su proceso pa cana.

 

Directie Volksgezondheid lo sigui informa tur comerciante di cualkier trabou encuanto fumigacion di e sanguranan. DVG ta spera di por informa tur comerciante riba Caya Grandi y den cercania debidamente cu GKMB ta atendiendo cu e situacion di sangura, unda nan lo ta controlando. Ministerio di Salubridad Publico ta recorda tur hende pa yuda mantene Caya Grandi limpi y pa evita criadero di sangura. Den e proximo dianan GKMB lo ta controlando un biaha mas den Caya Grandi.