Dia di Rei (27 di Aprel) ta kai riba un djabièrnè e aña aki i ta antisipá hopi aktividat sosial, inkluso na playanan públiko na Kòrsou. Meskos ku den Semana Santa 2018 un parti sustansial di pueblo di Kòrsou lo hasi uso di su playanan públiko. Gobièrnu a hasi esfuerso den e siman ei pa pone provishonnan temporal den forma di baño portátil i seguridat, esaki bou di koordinashon di CTB. Pero ta ora pa un maneho nobo di playa públiko, i pa prioridatnan aktualisá ku ta tene kuenta ku e tendensianan diverso di uso ku ta rekerí provishonnan permanente na e playanan di pueblo.
Gisette Seferina (PAR) ta di opinion ku e playanan públiko mas popular mester ta mihó ekipá pa por sirbi e nesesidatnan di e pueblo. Ta notabel ku hopi playa riba kosta sur ta bou di maneho privá i pueblo no tin akseso liber i/o grátis na nan. E momento ku un playa kai den man privá, pueblo ta pèrdè akseso grátis i hopi biaha nos ta pèrdè akseso liber, limitando asina por ehèmpel e orario ku por yega riba playa. Apesar di e echo ku na vários di e playanan privá mas popular ta kobra pa akseso na e playa, hopi usuario ku tin e moda, ta opta pa paga pa akseso na un playa privá i paga pa hasi uso di fasilidatnan na e playa en kuestion pasobra e playanan aki sí tin supervishon i mantenshon adekuá.
“E motibu ku pueblo ta opta pa paga pa bishitá un playa privá ta pasobra e playanan di pueblo ta mal ekipá i neglishá. Niun hende no ke bai un playa ku ta deskuidá i sushi,” asina Seferina a opiná. “Ta lamentabel ku un playa popular manera Playa Grandi, konosí tambe komo Playa Piskadó na Westpunt, no tin fasilidat di WC pa akomodá e usuarionan. Ta un bèrgwensa ku mester bisa e turista pero tambe e bishitante lokal pa bai skonde tras di baranka pa hasi nan nesesidat. Meskos, un playa bon bishitá manera Playa Caracasbaai no por akomodá un kantidat di penshonadonan ku tur dia mainta ta landa einan, i tin ku lora den sèrbètè, balansá riba un pia manera akrobat, pa por troka nan paña muhá”, asina Seferina a bisa. Asta a sosedé algun tempu pasá ku pa falta di supervishon riba playa, un kriatura ku a bai rekreá ku su famia na un otro playa lokal, a trapa den karbon kayente ku un hende a dera den e santu riba playa sin pensa riba e peliger di e akshon aki.
Seferina ta di opinion ku e maneho aktual di playa públiko, ku ta hasi uso primordialmente di kontratista pa atendé ku limpiesa, mantenshon i seguridat, no ta sufisientemente koherente o efektivo. E parlamentario ta pensa ku mester atendé ku e aspekto di supervishon kontinuo na playanan públiko dor di re- introdusí empleadonan públiko ku tareanan spesífiko di supervisá i atendé tur aspekto di maneho di e playanan di pueblo. Ta bini aserka ku pa algun aña kaba tin un tendensia di ‘kamper na algun playa públiko, ku ta trese kuné e nesesidat di supervishon durante anochi tambe.
“Ta tur dia tin aktividat na playanan públiko; no durante wikènt largu so! E provishonnan básiko manera baño, limpiesa general di e playanan i seguridat pa bishitantenan mester ta sufisientemente bon reglá pa e usuario por tin konfiansa ku e kondishon di e playa públiko ku e ta bishitá ta optimal,” asina Seferina a konkluí.
