Komunidat di Kòrsou kompleto ta sigui e desaroyonan rondó di COVID-19 di aserka i a risibí den e último simannan bastante informashon tokante COVID-19. I kada siudadano ta hasi nan esfuersonan pa prevení mas tantu posibel. Segun informashon di ekspertonan no tin un vakuna kontra e vírus ainda i tampoko un remedi ku por evitá ku un persona ta kontraé e malesa.
Den kuadro di esaki ta keda konsehá, dor di ekspertonan, pa subi e intensidat di e akshonnan di higiena ku ya kaba nos ta konosé pa otro gripnan. Esta laba man ku habon frekuentemente, mantené bo sistema imunológiko fuerte i mantené un distansia responsabel for di personanan ku tin síntomanan di grip.
A konsekuensia di e konsehonan aki, un grupo grandi den nos komunidat, ta hasi kompra di produktonan manera ‘handsanitizer’, napkins di papel, ‘sanitizing napkins’, desinfektante manera Lysol, pa tene nan man i superfisie rondó di nan limpi. Ademas mas i mas persona a kuminsá kumpra Vitamina C pa tene nan sistema di imunológiko haltu. Pa verifiká esaki Parlamentario Pauletta a bishitá diferente botika, supermerkado i toko.
Na mesun momento parlamentario Pauletta a bin ta konstatá ku hustamente e produktonan ariba menshoná a konosé un subida di preis drástiko den sierto tienda i negoshinan. Ta krea serka e parlamentario un sentimentu ku kier hasi uso di e desaroyonan rondó di COVID-19 pa subi e preisnan i saka bentaha di e situashon. Pero esaki ta afektá hustamente e hendenan ku ta den rísiko i tambe personanan ku tin un
entrada limitá. Spesífikamente hende grandi, mucha i persona ku tin un entrada limitá. Ademas skol, krèshnan i kasnan di hende grandi ku ta limpia ku mas frekuensia pa prevení. Den kuadro di esaki suskrito tin algun pregunta i petishon pa Minister Mc. William:
- Minister Mc. William por informá Parlamento si Ministerio di Desaroyo
Ekonómiko lo intensifiká e kontrol riba preis, spesífikamente riba e produktonan
ariba menshoná? - Minister Mc. William lo aserka Fundashon pa Konsumidó i tambe FTAC pa duna
asistensia den e kuadro aki? - Ministerio di Desaroyo Ekonómiko tin un number di app (+5999 511-1444)
kaminda e konsumidó por denunsiá subida di preis drástiko. Gobièrnu di Kòrsou
lo por intensifiká e informashon ku ta duna na konsumidó, den kuadro di e uso
di e app aki? - Minister Mc. William por informá Parlamento si tin kombersashon ku
komersiantenan tokante e subida drástiko di e preisnan? Si e kontesta ta no,
Minister MC. William lo ta dispuesto pa hasi esaki? - E dekreto ministerial ‘Makutu Básiko’ ta intenshoná pa krea un máksimo di preis
pa produktonan di primera nesesidat, spesialmente pa yuda e grupo
finansieramente vulnerabel . Minister MC. William ta dispuesto pa revisá e
dekreto ministerial aki pa wak su efektividat i si ta nesesario trese e
adaptashonnan nesesario?