Diamars anochi Partido di Pueblo Arubano AVP a introduci Giovanni Arendsz como un di su candidatonan nobo pa eleccion 2017. AVP ta sumamente satisfecho di por conta cu e confiansa di e lider deportivo aki pa forma parti di su ekipo cu cual kier sigui trece progreso y bienestar pa Aruba. Arendsz ta un figura bon conoci y respeta den nos comunidad; un berdadero yiu di tera cu tin hopi conocemento y experiencia pa aporta na su pais.
Giovanni Arendsz ta bin originalmente di e bario di Lago Heights cu un formacion cu a inclui e pensamento cu oportunidad ta presenta pa esnan cu ta dispuesto pa traha. E enseñansa aki ta loke e candidato ta kere cu a yud’e hopi den bay dilanti na nivel personal y profesional.
Como hoben y den tempo di ciere di Lago, e famia a busca un miho bida na Hulanda unda Arendsz ta descubri su pasion pa deporte. Despues di hopi esfuerzo, pasenshi y dedicacion, a logra bira no solamente un profesional riba e tereno di fitness, pero tambe a bira e campeon di Hulanda den bodybuilding.
Cu e conocemento y experiencia adkiri, Arendsz ta regresa su isla y ta bira un empresario chikito habriendo su propio gym cu tin awo un trayectoria largo y exitoso. Cu e meta ey alcansa, Giovanni a pone su bista riba retonan mas grandi y a cuminsa siribi su pais como dirigente deportivo.
E carera aki a cuminsa na e Federacion di Bodybuilding di Aruba, den Comite Ollimpico Arubano y tambe den Aruba Sport Unie. Mas laat tambe a asumi e reto y expande dor di acepta funcion como President di Federacion di Bodybuilding pa region di Caribe y Centro America.
Decadanan despues di su titulo como Campeon Hulandes di Bodybuilding, pero awo cu yiunan, Arendsz a sinti e necesidad di duna nan e ehempel como atleta despues di a demostra su mes caba como dirigente.
Mirando cu na Aruba esey no lo tabata etico, Giovanni a entrena fuertemente y a bolbe conkista varios titulo, incluyendo esun maximo. Esaki a habri caminda pa federacion Hulandes invite pa forma parti di e delegacion nacional den e competencia Europeo unda tambe el a sa di conkista varios titulo.
Arendsz ta di opinion cu tur su logronan no ta solamente personal, pero tambe pa pais Aruba. “E orguyo cu mi tabata sinti ora di scucha mi nomber y esun di mi pais wordo anuncia pa para y competi contra e mihonan di mundo, ta algo cu semper lo keda cu mi,” e candidato nobo di AVP a expresa.
E trayectoria profesional na Aruba y den exterior a permiti Arendsz acumula conocemento balioso riba e diferente maneranan con deporte ta beneficia un pais, en general. “Esaki ta un conocemento y experiencia cu awe humildemente mi ta desea di pone na disposicion di tur deporte en general,” Arendsz ta afirma.
