Gino Goeloe (FUTURO): Pa mas cu dies aña pasa a señala e problema di nos grandinan den cas di cuido

Problema den cas di cuido ta conoci pa mas c’un decada caba. Asina parlamentario Gino Goeloe di fraccion FUTURO a trece dilanti durante un conferencia di prensa. Gabinete AVP/FUTURO a analisa e problemanan y su persona mes como ex-director di Wit Gele Kruis a papia di esaki for di 2012 caba, a cuminsa señala e cosnan iregular cu ta pasando den e casnan priva.

Goeloe a duna di conoce e tempo ey cu hopi cos pasando mester pone paro na dje, y awe como parlamentario esey e ta bisa ta su motibo di ta sinta den e stoel aki tambe. Hustamente p’e problemanan aki cu nos grandinan ta pasa den dje pa loke ta cuido den cas priva y tur otro caminda. Aruba su poblacion ta consisti di 108 mil persona di cual 26% ta riba di 60 aña, cual ta 28 mil persona, y di esaki 20 mil tin mas cu 65 aña. “Dus e problema ta grandi na Aruba”, Goeloe ta subraya. E pronosticonan ta bisa cu pa 2030, lo ta un 28% di nos poblacion cu lo ta riba di 60 aña, cual ta 30 mil habitante. Eynan caba bo ta wak cu mester haci algo urgente.

Solucion ta na caminda

Como ex-director di Wit Gele Kruis, Goeloe a bisa di a bini cu diferente punto e tempo ey pa pone mas atencion n’e cuido na cas, na SABA, y e casnan priva. Awor tin solucion na caminda segun Goeloe pasobra den presupuesto 2026 a aloca mas placa den e parti di Wit Gele Kruis, cual ta e parti di cuido na cas, y SABA ta bay haya tambe e placa cu nan merece. “Pero atrobe, e placa cu SABA lo haya nos lo parti’e den e presupuestonan venidero dus pocopoco nos ta bay ataca e problema aki y wak pa nos grandinan haya bon cuido. Y tambe zorg pa nos grandinan haya e cuido profesional cu nan tin derecho ariba dje”, segun Goeloe.

Pa mas lesa TREMPAN.COM.