Gino Frans: 22 aña liber di droga, pero cu suplica pa yuda esnan cu ta adicto

Gino Frans ta 22 aña liber di droga. E no ta facil. Pero e ta un motibo pa yuda hende ta liber di droga. E ta splica cu sigur dia 5 di Januari, e ta celebra e dia ey, pasobra ta un dia cu Frans a entrega su bida.

E tabata un adicto grandi. El a cuminsa cu marihuana. For di eynan el a bay pa alcohol, alcohol el a bay pa cocaina. Asina el a sigui. El a bay biba na Hulanda, caminda el a yega te na heroina na Hulanda. Poco poco el a sink den droga. El a kere sigur cu e lo domin’e, pero a yega un dia cu e droga mes a domin’e, cu e tambe a lastra riba caya. Dia 5 di Januari ultimo, el a cumpli 22 aña liber di droga. E por bisa cu e ta clean y liber. El a purba cu Dios y e palabra ta bisa cu si “Dios hacibo liber”, bo ta berdaderamente liber. Frans a bisa cu si bo por cambia. Ora bo pone un paso, bo por cambia.

Un paso pa yuda hende
Gino Frans a splica cu despues di dos aña cu el a rehabilita, a yega un carga den su curason pa yuda esnan cu ta perdi. El a pensa cu si e por, otro tambe por. Asina ey a yega un momento cu el a cuminsa yuda hende riba caya. Na Hulanda el a cuminsa prome. E tabata exitoso. E instancianan na Hulanda tabata coopera cu otro. Bo ta haya tur e departamentonan cu tin di haber cu adiccion, ta yudabo. Asina e mes a cuminsa adictonan na Hulanda y el a coy experiencia.
El a bin Aruba bek y a mira e carga, el a mira e adictonan riba caya. Amigonan cu el a laga atras cu tambe a coy caya, a bin un carga pa habri un cas na Aruba, cual tin awor aki cu ta Centro Elizier.

Haciendo e trabao
Frans a bisa cu e trabao aki no ta facil. E cooperacion na Aruba nunca a drecha. E ta 0,0. Lamentablemente pa un pais asina chikito. Si ta traha hunto, laga cada hende den nan propio balor, lo nos a yega hopi leu den e pais aki. Dimes e trabao ta duro. Traha cu hende normal mes ta dificil. Corda cu hende cu tin problema.

Sobrevivencia
Tin un persona cu ta traha na e Centro. E tin un fundacion cu yama Stichting La Posada. E ta esun cu ta provee pa Centro Elizier. Ta pidiendo subsidio y pa hopi aña ta wardando pa subsidio cu nunca a yega. Gobierno a yega di yuda cu cierto cosnan, cu cuminda y cu personal di gobierno, pero esaki no a funciona. Nan kier manda hende cu tin problema den otro departamento. Esaki nunca ta logra, pasobra nan ta bin cu e problema aki tambe. Nunca por traha cu e personanan ey. Loke ta pasa ta cu nan ta yuda cu cuminda so awor aki y nada mas.
E ta hopi duro, segun Frans. Nada no ta gratis. Si e persona cu ta yudando bisa cu e ta stop, ta un problema.

No ta motibo pa give up
Centro Elizier ta kere den Dios y cu e lo provee. E no mester bay asina eigenlijk. Frans ta kere cu nan mester a yuda nan masha tempo caba. E centro aki ta uno cu ta funcionando. El a duna su fruto. Hendenan cu a rehabilita, cu a coy nan bida bek, cu a bay den sociedad atrobe, pronto lo haci un grabacion cu a libera di droga cu Centro Elizier a yuda nan. E lo bay haci un reportahe di nan, con nan bida ta awor aki, con nan a drenta den e centro.
Centro Elizier mester di ayudo. Gobierno mester saca un man. Henter e comunidad mester participa. Den cada famia na Aruba, tin un adicto.

Marihuana ta e comienso
Gino Frans tabata un persona cu a cuminsa cu marihuana. Hopi di e personanan cu e conoce a cuminsa cu marihuana. A wordo bisa cu marihuana ta un mata di Dios, pero e ta kere den e remedi. E no ta kere den e humamento.
Na momento cu bo bay legalis’e, e muchanan hoben, ta bisa cu ta algo legal. Loke ta pasa e ora, e ta bira mas facil pa usa. Awor aki mes tin problema cun’e. Laga cu legalis’e, e ta bira mas problema ainda den punto di bista di Frans.
Tempo e tabata hoben, e tabata defende marihuana te na morto. Si papia malo di dje, e ta bira loco. Despues di tempo, ora cu keda us’e, ta hacibo un adicto. Frans a splica cu na momento cu el a huma marihuana bek, e tabata trankilisa. E ta un vicio, un droga.
E ta sigui splica cu ora cu bo no tin’e den bo sistema, bo no tin placa pa cumpr’e, bo ta bira loco. Bo mester us’e bo curpa ta pidi p’e, aunke e ta un softdrug. E ta un droga.
Frans tabata usado di marihuana. El a hum’e 4 aña straight. A yega momento cu cosnan a bay den su contra, el a cuminsa mira cosnan, biba den un fantasia. Marihuana tabata pone biba den un fantasia.

Legalisacion no ta corecto
Frans ta pensa cu legalisacion di marihuana no ta corecto. No tin mester. Placa cu nan kier usa eynan, us’e den centronan di rehabilitacion. Tin centronan cu no ta di gobierno, NGO. Preferibel yuda nan, hinca e placa den nan, pasobra Aruba tin hopi adicto. Tin 800 mucha cu ta psicotico, cu ta scucha stem, cu ta den PAAZ y no tin luga pa yuda nan. Frans ta opta pa enbes di habri un cas pa planta marihuana, e lo coy e placa y yuda e muchanan ey.
E ta haci un suplica na Gobierno, vooral prome minister Evelyn Wever-Croes, cu tin 800 mucha cu ta mal cria, cu ta riba caya of di cas, cu tur a usa droga, usa marihuana, usa moly. Coy e placa ey y us’e. Esey ta un prioridad. Us’e riba e muchanan cu tin problema. E informacion ta generalmente conoci. Por sinta cu Respaldo y nan por duna e cifra di e adictonan cu tin

Comments

comments