Esnan cu ta sigui noticianan internacional por a tuma nota cu ta existi un preocupacion pa un tipo nobo di droga cu ta den circulacion, principalmente den clubnan nocturno.
Casonan di violacion, haciendo uzo di un of otro droga pa logra e meta, ta algo cu ta conoci pa hopi tempo caba. Loke awo ta aparece cada bes mas ta e violacion den grupo. Ta probecha di vulnerabilidad y inocencia di e victimanan pa comete e crimennan. Den cierto casonan ta haci uzo di droga y un di e droganan cu mas ta uzando ta e GHB, yama e droga di violadonan.
Nan ta uza e droga aki pa tin mas poder riba nan victimanan. No ta kita afo cu tin hende ta uz’e pasobra nan kier pero e violadonan ta uza esaki cu nan meta specifico. Tin pareha cu ta uza esaki durante nan salida, pasobra nan ta bisa cu e kimico aki ta duna nan mas estimulo.
GHB (gamma-hidroxibutírico) ta un remedi parecido na GBL (gamma butirolactona), pero no ta igual. E ultimo aki ta bende di forma legal y e ta un solvente industrial. Sinembargo, unabes cu e drenta den e organismo e ta bira GHB. Mirando cu e droga ta bini den forma di likido, loke e violadonan sa haci ta tira algun druppel den bebida di un persona, y e droga ta mescla cu e bebida y e persona ta uzando esaki sin cu e mes ta na altura.
Ki efecto GHB ta duna
Manera cu a menciona anteriormente, tin pareha cu consumi GHB pasobra e tin un poder estimulante. Esaki ta crea mas euforia pa nan, ademas di aumenta e gana di haci sex. Pero mester tene hopi cuidao cu e dosis.
Si e cantidad ta un fraccion menos cu un mililiter, e por tin consecuencianan grave pa e persona. Na prome luga, e persona ta perde e nocion di loke e ta haciendo, y pa e motibo ey e GHB ta e droga nobo cu e violadonan ta uza.
Ademas di e hecho cu e persona droga ta perde consciencia, e por haya convulsionnan, papia den forma bruha y tambe sufri un paro respiratorio. Cada persona ta diferente, tin hende cu solamente un druppel despues di 20 minuut, nan ta perde conocemento.
Entre añanan 2014 y 2018, na Wales na Inglatera, a conta 120 morto pa culpa di e droga aki. Ta dificil pa sa e cifra exacto di mortonan a causa di esaki, pasobra e droga aki no ta inclui den e testnan toxicologico rutinario cu ta wordo haci ora cu personanan fayece di forma repentino.
