Nunca nos por a biba pensa cu un dia nos lo tin cu experiencia e momento aki den nos bida, nunca nos por a biba pensa cu lo nos experiencia un situacion cu ta paralisa e “dushi bida”. Biba nos a biba semper cu desacuerdo politico, den un forma partidista y cu diferencia di opinion, pero awe lo relevante ta con nos por comparti un pida pan cu nos ruman y con nos lo sobrevivi na Aruba den e proximo luna nan.
Mientrastanto, lo mas devastador ta, ora cu “nos” e grupo mas hoben popularmente conoci como e Millenials, tin cu atrobe biba cu e realidad cu un grupo cu no ta realmente representa nos pensamento, cu ainda no ta considera nos igual pa tin un fair share den e poder, tin cu dicidi pa nos futuro y di nos yiunan. Esaki, sabiendo cu probablemente nos ta e grupo cu e crisis aki y su consecuencia nan lo dal mas duru, ora nos djis pensa cu apenas algun di nos a caba di cuminsa cu nos carera laboral of hopi di nos ainda no a encontra e trabou cu nos tin mester di dje pero tur dia ta sigi lucha pa por purba biba na maske ta un nivel di clase media.
Pa hopi cu kier ignora of bagatalisa, no lubida cu cada aña mas y mas grandi e generacion di adulto aki ta bira, y kisas danki na desaroyo nan moderno na mundo, nos ta forma un di e generacion nan mas educa / informa. Lastimamente anos no a biba pa experiencia ningun “boom” den e ultimo decada nan, solamente crisis, costo di bida halto, y te awe sin suficiente facilidad digital, laboral, social pa alivia un tiki di e peso cu nos tin cu carga pa nos mes y nos famia.
Mientras e dia nan ta conta, ta reina secrecia y desconfiansa cu no ta duna espacio pa unifica y nos tin cu wak manera ta un serie di Netflix con ta hunga cu decision nan pa nos futuro.
Di berdad ya mucho no ta interesa nos kico a pasa caba, pero sino con nos ta bay cuminsa di nobo y con nos ta bay recobra e pais aki, mientras cu nos ta sin e poder pa dicidi pa nos mes. Aunke no tin un base huridico pa e forma cu madre patria ta haci su propuesta y nos sa cu locual ta proponi ‘as is’ no ta aceptabel, ya ta mas cu 2 luna nos ta wardando si lo tin un contra propuesta pa Hulanda!
E realidad ta cu no tin masterplan si esnan cu mester ehecuta no ta kere den dje, no tin futuro sin strategia, no tin strategia si no tin e capacidad y sigur no tin e speransa si esnan cu ta dicidi pa nos a crece y experiencia un luho cu anos no a conoce.
Tanten nos ta keda cumpra tempo pa orguyo politico e situacion lo sigi deteora y Hulanda lo tuma over den un forma mas extremo cu locual ta proponi awor, y realidad ta tambe cu locual ta proponi no ta locual nos por acepta sin mas, pero tanten cu ta keda diariamente bezig cu decision nan descabeya y PR politico y ta sigi ocasiona mas crisis den crisis e holoshi ta mustra 5 pa 12 y ainda no a subi e tarima pa dialoga ariba un otro nivel y cu contenido.
Ta basta hunga cu nos futuro!
