E politica profesional, basa riba hechonan ta keda haci falta na nos pais. Nos por a tuma nota recientemente di un publicacion di Oficina Central di Estadistica, relaciona cu e Cuentanan Nacional di Aruba pa aña 2013 – 2017.
Aunke e cifranan di aña 2017 ta preliminar nos por conclui cu anualmente cu excepcion di 2013 tawata tin un crecemento di e Producto Domestico Bruto (PDB) mas halto cu anteriormente tawata wordo calcula.
Esaki ta haci cu e percentahe di e debe nacional den relacion cu nos Producto Domestico Bruto ta un percentahe mas abou cu anteriormente tawata wordo presenta pa varios politico y gobernantenan na final di 2017 durante campaña electoral.
Por a tuma nota claramente cu no mucho atencion a wordo duna na e publicacion importante aki, cu excepcion di un miembro di parlamento di oposicion.
Kisas paso politicamente e informacion aki no ta uno cu e gobernantenan lo kier comparti.
Di e publicacion aki por
saca dos conclusion importante:
1) e debe nacional ta mas abou cu tawata wordo bisa
2) e maneho di Gabinete anterior tawata duna su fruto.
Acaso e conclusion aki ta loke nos gobernantenan no kier pa e pueblo realisa?
Cu otro palabra informacion ta solamente wordo comparti of crea ora cu e ta na beneficio di nos gobernantenan?
Den e mundo actual caminda cu bon gobernacion ta e base principal pa garantisa un democracia fuerte, transparencia di informacion ta wordo limita pa sirbi un meta politico. E pueblo merece sa of scucha e realidad, basa riba cifranan real y nos gobernantenan mester por goberna nos pais basa riba un politca profesional y basa riba hecho y no cu rason politico.
Si e hechonan ta haci cu tin espacio pa ahusta cualkier maneho pa drecha e poder di compra di nos pueblo esaki lo mester wordo haci.
Mi bon Aruba, laga nos no perde e speransa cu un dia nos como e hobennan lo por hiba un politica profesional sincero na nos pais y no basa ariba rason nan politico pero cu hecho. Cu nos por informa y eleva e conocemento di nos comunidad, basa ariba e realidad. Cu nos comunidad por cuestiona, y alcontrario, no wordo malinforma-indoctrina cu informacionnan pa beneficio politico. Nos pais merece mihor.
E cifranan ta confirma cu nan no ta manera a ser bisa, Aruba tawata tin un crecemento economico entre 2013-2017, acepta e realidad aki ta importante pa drecha e poder di compra di nos comunidad y trese e confiansa bek serca e comerciantenan y inverisionistanan local.
Of paso esaki lo por nifica un cambio di agenda politico, nos ta prefera di mantene e comunidad leu di e realidad?
Publicacion CBS: http://cbs.aw/wp/wp-content/uploads/2019/03/GDP-2013-2017-8-maart-2019.pdf
