Gerald Vingal ta keda Director di Migracion Aruba

Ta di dos intento cu Gabinete Wever-Croes, bou maneho di Minister mr. Andin Bikker ta haci pa purba move Gerald Vingal for di su puesto. E prome biaha nos a informa di esaki, den cual un Consehero di e Minister a purba convence Vingal pa e “move” y awor atrobe, segun fuentenan den Migracion, e Minister mes lo a haci’e un oferta. Gerald Vingal tabatin e oportunidad di bira Consehero di Minister si e lo a considera pa laga su puesto di Director di Migracion “bay”.

A dune un siman pa pensa y desde dialuna ultimo e ta bek na Migracion. Eyden el a bisa su coleganan “Gerald tey pa largo”. Nos a purba haya contacto cu Gerald Vingal mes pero tabata envano. Su empleadonan eyden a bisa di ta contento di mire bek na pia di trabou.

Gerald Vingal a studia Bestuursrecht na Hulanda y a profesionalisa su mes den leynan y derechonan laboral. Despues di su estudio el a cuminsa su carera na Aruba den Cuerpo Policial Aruba, sigui pa Departamento di Recursonan Humano, tabata Consehero di Minister di Enseñansa y despues a aplica y bira Director di Migracion Aruba. El a logra optimalisa e departamento y a ricibi reconocimento internacional entre otro pa ehecucion di e proyecto “Happy Flow”.

Tendencia di “Bula nan cabes”

Den pasado, bou Gabinete Oduber, e tendencia di kita hefenan di departamentonan di Gobierno a bira popular. E mesun Andin Bikker, e tempo ey cu PDR, a propaganda e tendencia aki contra MEP den campaña di aña 2005. Pero ta nota cu e ultimo lunanan atrobe e tendencia aki a lanta cabes. No ta sigur si e tin di haber cu politica of cu sindicalismo, pero a pidi cabes di e Director di NV Elmar, di ASTEC, di METEO, di CBS, di DVG y ta purba tambe na MIGRACION. Pa casualidad e sindicato STA ta envolvi den hopi di e departamentonan of companianan aki. Por corda cu algun tempo atras sindicato SPA tambe a pidi cabes di Dolfi Richardson, te cu despues mayoria Polis a core cu e directiva di SPA por completo tambe.

Migracion Aruba ta un departamento nobo

Entrante dia 1 di september 2017, oficialmente Instituto Alarma y Siguridad Aruba (IASA), funda tempo di Minister Rudy Croes, a stop di existi. Na su luga a funda Migracion Aruba, cu Gerald Vingal na cabes. E departamento aki ta atende tur asunto di migracion na aeropuerto y wafnan, mientras cu Warda nos Costa a pasa tambe bou di nan.

Tocante Migracion Aruba

A introduci e ofishi di ambtenaar di Inmigracion dia 19 di maart 1969 bou di Cuerpo Policial di Antias, den e departamento “Sectie Vreemdelingen Politie”. Dia 1 di september 2002 a los e departamento for di Cuerpo di Polis y a inclui den e organisacion nobo DINA (Directie Immigratie en Naturalisatie Aruba). Cuater aña despues na 2006 a elimina DINA y a crea IASA (Instituto Alarma y Siguridad Aruba) unda a aloca Radar 911, Warda nos Costa y Servicio di Inmigracion.

Aunke cu e intencion inicial tabata pa dia 1 di januari 2017 crea un solo instancia, Migracion Aruba cu dos componente, esta “Grenscontrole” conoci como Servicio di Inmigracion na Aeropuerto y na wafnan y “Vreemdelingentoezicht” conoci awendia como Warda nos Costa, toch no a logra keda cla te awor dia 1 di september cu e cambio ta drenta na vigor.

Servicio di Inmigracion ta consisti di mas o menos 60 empleado mientras cu Warda nos Costa ta conta cu mas o menos 17 empleado.