Scol di EPI tin un prijskaartje di loke gobierno ta inverti y tin e parti unda e studiantenan ta aporta cu nan schoolgeld di cual un parti ta bay den mantencion. Antes nan a logra di haci un investigacion riba con e placa ta wordo inverti y a bin na un suma di casi 60% di nan entradanan ta bay na mantencion. Awor aki ta bezig cu un inversin grandi pa nan netwerk, cual ta un di e mas grandi na Aruba y ta rekeri su inversion tur aña. Tin como 10 computerlokaal pa e studiantenan y cada tres pa cinco aña ta cambia e computernan pa mantene e infrastructura.
Schoolgeld
Tin pa e studiantenan tres tarifa. Tin e studiantenan local, unda tur ta paga e mesun tarifa. Tin e studiantenan internacional, mas tanto na e seccion di hospitalidad y turismo, unda nan ta paga un otro tarifa.
E studiantenan local awor ta paga pa e prome aña 40 florin pa inscripcion. Despues 350 florin como schoolgeld y 50 florin pa actividad. Si nan ta den examenklas nan ta paga 75 florin, ta contribui cu e actividad pa e diplomauitreiking. Tin hopi studiante cu por ehempel no ta logra y ta acomoda nan den cierto sentido cu ta duna nan un areglo di pago cu nan por pag’e den un periodo un tiki mas largo. Hopi biaha, si tin situacionnan social, ta tene cuenta cu eseynan tambe. Y naturalmente pa ora cu nan haya nan diploma, e schoolgeld tin cu wordo paga pa nan por haya nan diploma, Danker a splica.
Celebracion
EPI ta den un celebracion. Nan ta cumpli 20 aña y kier mira bek con EPI a crece. E origen ta di cuater scol MBO cu a bin bao di un capa. Ta wak ex Hotelvakschool, cu tabata na Bushiri, a bira Unit Hospitalidad y Turismo. Tin MTS Cesare Terzano cu a bira Unit Tecnologia. Tin MAO cu a bira Unit Economia y tin esun tambe Salubridad y Servicio cu tabata Paso Sigur. Hunto nan a bin bao di un capa na 1997. E tabata un project dossier di aña 1992 cu sosten di FDA cu a inverti 26 miyon pa e proyecto por a construi e edificionan y haci e renobacion, pa asina forma e campus actual.
Con lo recorde
A haci diferente actividad. Na comienso di aña a haci un actividad pa e personal. Despues dos siman pasa tabata tin fiesta pa e studiantenan y personal. Otro siman lo bay tin un recepcion special pa e stakeholdernan y comercio cu ta sostene e scol den diferente area. E pasantia ta un parti hopi importante di e opleiding y kier reconoce nan tambe nan aporte cu EPI. Ta haya sosten di gobierno, pero nan aporte tambe ta hopi importante pa e scol y kier reconoce esey den e recepcion cu lo bay duna otro siman.
