Minister Plenipotenciario Guillfred Besaril a ricibi bishita di Mario Gonsalves, kende a ricibi recientemente e HKU Award pa su pelicula “Patroon”. E HKU Award ta un premio di e Scol di Arte na Utrecht y esaki ta prome biaha cu un Arubiano pa gana e premio aki cu un film den e idioma Papiamento.
Mario a conta minister Besaril con ela yega na e idea pa traha e film aki. Mario tabata na Aruba pa tuma un time out y aki ela topa cu hopi di su amigonan di antes. Ela ripara cu nan ta hopi mas relaha, mientras cu nan no tin hopi modo. ‘E aspecto aki conhunto cu mi experencia cu mi a wordo lanta door di mi mama y e dificultadnan cu mi a enfrenta aki na Hulanda a bisami cu mi kier traha un film riba esaki,’ asina Mario ta conta.
E pelicula “Patroon” ta conta e storia di e yiu di Curaçao Malik cu a emigra hunto cu su mama Zoraya pa Hulanda pa un mihor futuro. E bida na Hulanda den e bario di Bijlmer na Amsterdam no tabata facil y tur e contratiempo cu nan a bin ta haya cu a pone cu poco poco Malik a conoce su caminda pa madurez.
Mientrastanto Mario Gonsalves tin su propio compania di produccion cu ta haci produccionnan na diferente paisnan rond mundo. E pelicula “Patroon” a wordo presenta na diferente festivalnan, manera “De Nederlands Filmfestival”. Despues cu e pelicula repasa e festivalnan elo wordo transmiti na e canal di television Vice, cu tambe tabata partner den produccion di e pelicula aki.
Minister Besaril a bisa di ta hopi orguyoso riba nos hobennan cu pafor di Aruba ta logra haci cosnan grandi y asina capta atencion nesesario. Sr. Besaril a felicita Mario Gonsalves cu e premio aki y a desea Mario tur clase di exito den futuro.
Nota pa redacion: E potretnan ta cortesia di Cas di Aruba
